Izraeli fundoset edhe më thellë, Turqia jep mësim futbolli ndaj Gjeorgjisë

Mbrëmja e sotme e kualifikimeve për Kupën e Botës 2026 solli spektakël dhe shumë emocione në fushat evropiane, ku u zhvilluan shtatë ndeshje në termin nga ora 20:45.

Italia ndëshkon Izraelin në krizë

Në stadiumin “Renzo Barbera” në Palermo, Italia ka triumfuar bindshëm ndaj Izraelit me rezultat 3:0, duke e zhytur kundërshtarin edhe më thellë në krizë.

Golat për “Azzurrët” i shënuan Retegui nga penalltia në fund të pjesës së parë, Retegui sërish në minutën e 74-të, dhe Mancini për rezultatin përfundimtar.

Kjo është humbja e tretë radhazi për Izraelin, që po kalon një periudhë të errët si në aspektin sportiv, ashtu edhe moral.

Turqia me katër gola ndaj Gjeorgjisë

Në Stamboll, Turqia ka dhuruar spektakël futbolli duke mposhtur Gjeorgjinë me rezultat të thellë 4:1.

Ylli i takimit ishte Merih Demiral, i cili, ndonëse luan si mbrojtës qendror, realizoi dy gola, duke udhëhequr “ay-yıldızlı” drejt një fitoreje mbresëlënëse që i mban në vendin e dytë të grupit E.

Anglia shkund Letoninë

Në Riga, Anglia tregoi forcën e saj ofensive duke fituar 5:0 ndaj Letonisë.

Golat i realizuan Gordon, Kane (dy herë), Tonisevs (autogol) dhe Eze.

Ronaldo shkëlqen, por Portugalia ndalet

Në Lisbonë, Portugalia nuk arriti më shumë se barazim 2:2 ndaj Hungarisë, pavarësisht performancës së jashtëzakonshme të Cristiano Ronaldos, i cili në moshën 40-vjeçare shënoi dy gola për përmbysje të përkohshme.

Megjithatë, në minutat e fundit, Szoboszlai siguroi një pikë të vlefshme për hungarezët.

Spanja pa mëshirë ndaj Bullgarisë

Në “La Cartuja” të Sevilles, Spanja fitoi bindshëm 4:0 kundër Bullgarisë, me Mikel Merinon si protagonist kryesor, pasi mesfushori realizoi dy gola dhe u shpall lojtari i ndeshjes.

Irlanda minimale, por e sigurt

Në Dublin, Irlanda arriti një fitore të ngushtë 1:0 ndaj Armenisë, falë golit të Evan Fergusonit, duke ruajtur shpresat për një kualifikim historik në fazën e “play-off”.