Zelensky: Kemi vendosur pikat kryesore për të arritur fundin real të luftës

Presidenti ukrainas Volodymyr Zelensky ka deklaruar se pas bisedimeve produktive mes zyrtarëve ukrainas dhe emisarëve të presidentit amerikan Donald Trump, janë përgatitur disa dokumente draft, duke përfshirë ato për garancitë e sigurisë për Ukrainën, rindërtimin dhe një kornizë bazë për t’i dhënë fund luftës me Rusinë.

Sipas postimit të Zelenskyy-t në X (pas informimit nga negociatorët ukrainas Rustem Umerov dhe Andrii Hnatov), bisedimet u zhvilluan në Majemi të Floridës gjatë fundjavës, me delegacione ukrainase, evropiane dhe amerikane.

Bisedime të veçanta u mbajtën edhe me përfaqësues rusë.

Zelensky theksoi se pikat kryesore janë vendosur për të arritur fundin real të luftës dhe për të parandaluar një invazion të tretë rus (pas atij të 2014-ës në Krime dhe Donbas).

Megjithatë, Kremlini, përmes zëdhënësit Dmitry Peskov tha se këto bisedime nuk duhet të shihen si një përparim i madh, por si një proces pune që do të vazhdojë.

Në të njëjtën kohë, Rusia kreu një sulm masiv ajror mbi sistemin energjetik të Ukrainës, duke shkaktuar të paktën 3 të vdekur (përfshirë një fëmijë) dhe ndërprerje të gjera të energjisë elektrike në disa rajone, pikërisht para festave të Krishtlindjeve. /rtsh/