OKB kërkon ndërprerje të menjëhershme të planit izraelit për kontroll ushtarak të Rripit të Gazës

Plani i qeverisë izraelite për të arritur një pushtim të plotë ushtarak të Rripit të Gazës së pushtuar duhet të ndalet menjëherë, deklaroi Komisioneri i Lartë për të Drejtat e Njeriut Volker Turk në një deklaratë.

”Ky plan, i miratuar të enjten në mbrëmje nga kabineti i sigurisë izraelite bie ndesh me vendimin e Gjykatës Ndërkombëtare të Drejtësisë se Izraeli duhet t’i japë fund pushtimit të tij sa më shpejt të jetë e mundur, realizimin e zgjidhjes me dy shtete dhe të drejtën e palestinezëve për vetëvendosje”, akuzoi Turk.

“Ky përshkallëzim i ri do të çojë në dëbime edhe më masive të detyruara, më shumë vrasje, vuajtje të padurueshme, shkatërrime të pakuptimta dhe krime të tmerrshme”, denoncoi komisioneri i cili akuzohet rregullisht nga autoritetet izraelite për prirje pro palestineze dhe konsiderohet person ”non grata” në vend.

Turk i bëri thirrje qeverisë izraelite të lejojë që ndihma humanitare të hyjë në Rripin e Gazës “pa pengesa”, “në vend që të përshkallëzojë këtë luftë” për të shpëtuar jetët e civilëve.

”Pengjet e rrëmbyera gjatë sulmit të 7 tetorit 2023 nga Hamasi në territorin izraelit, duhet të lirohen menjëherë dhe pa kushte nga grupet e armatosura palestineze”, kërkoi më tej zyrtari i OKB-së./atsh/