Milani triumfon ndaj Comos, Rabiot shkëlqen me dy gola spektakolarë

AC Milan ka arritur një fitore të madhe në transfertë ndaj Comos, duke përmbysur rezultatin dhe triumfuar 1-3, në një ndeshje ku protagonisti absolut ishte Adrien Rabiot me dy gola vendimtarë.

Takimi nisi më mirë për vendasit, të cilët kaluan në avantazh në minutën e 10-të. Pas një goditjeje nga këndi, Marc Oliver Kempf u ngrit më lart se mbrojtja dhe me kokë mposhti portierin për 1-0.

Como vazhdoi të krijojë raste dhe ishte pranë golit të dytë, por Mike Maignan reagoi shkëlqyeshëm në minutën e 41-të, duke ndalur një tentim të rrezikshëm të Lucas Da Cunha.

Në fundin e pjesës së parë, ndeshja mori një kthesë vendimtare. Kempf shkaktoi penallti, ndërsa Christopher Nkunku ishte i saktë nga pika e bardhë në minutën 45+1, duke barazuar shifrat në 1-1.

Në pjesën e dytë, Milani u shfaq më dominues dhe në minutën e 55-të arriti përmbysjen. Rabiot përfitoi nga një top i mbetur në zonë dhe me një goditje precize shënoi për 1-2.

Francezi vulosi paraqitjen e tij brilante në minutën e 88-të, kur realizoi një gol spektakolar nga distanca për rezultatin përfundimtar 1-3, raporton Express.

Me këtë fitore, Milani ngjitet në pozitën e dytë të tabelës me 43 pikë, ndërsa Como mbetet në vendin e gjashtë me 34 pikë.