Zelensky: Ukraina ka humbur rreth 50 mijë ushtarë

Presidenti ukrainas Volodymyr Zelensky deklaroi se Ukraina ka humbur rreth 50,000 ushtarë që nga fillimi i pushtimit rus në shkallë të plotë, ndërsa afërsisht 400,000 trupa janë plagosur.

Duke folur në një intervistë për Fox News , Presidenti pranoi se ngurronte të zbulonte shifra të hollësishme sepse informacioni mund ta ndihmonte Moskën të vlerësonte gjendjen e forcave të armatosura të Ukrainës.

“Më vjen keq, për të qenë i sinqertë, nuk dua të jem shumë i hapur për këtë, sepse rusët do ta kuptojnë se çfarë po ndodh me ushtrinë tonë. Kemi rreth 50,000 ushtarë të vrarë dhe rreth 400,000 të plagosur. Dhe ka një numër të madh njerëzish që janë zhdukur.”

I pyetur për humbjet e palës ruse, Zelensky pretendoi se Rusia ka pësuar rreth 1.6 milion viktima që nga fillimi i luftës, përfshirë afërsisht 700,000 ushtarë të vrarë.

Në lidhje me gjendjen aktuale të luftës, ai theksoi  se “Nga situata reale në fushën e betejës, është e rëndësishme që iniciativa të mos jetë në duart e Rusisë. Ne nuk po humbasim dhe ata nuk po fitojnë.”

Zelensky argumentoi gjithashtu se konflikti në Lindjen e Mesme po ndikon në luftën në Ukrainë.

Sipas tij, Rusia përfiton nga paqëndrueshmëria e rajonit, sepse kjo shpërqendron vëmendjen dhe burimet ushtarake amerikane.

“Rusia është shumë e lumtur – ne e dimë nga inteligjenca se ata janë shumë të lumtur që nuk ka një fund të vërtetë të luftës në Lindjen e Mesme. Pse? Sepse ata e kuptojnë se meqenëse Shtetet e Bashkuara janë përfshirë në këtë luftë, ata nuk mund ta ndihmojnë Ukrainën në të njëjtin nivel si më parë. Për shembull, me Patriotët.”

Ai shtoi se Rusia ka furnizuar Iranin me dronë të përdorur në sulme në Lindjen e Mesme dhe kundër Izraelit, si dhe ka siguruar imazhe satelitore për bazat amerikane në rajon.

Shifrat e fundit të publikuara nga Zelensky ndryshojnë pak nga ato të mëparshme. Në shkurt 2026 ai tha se rreth 55,000 ushtarë ukrainas ishin vrarë, ndërsa në shkurt 2025 raportoi mbi 46,000 të vrarë dhe dhjetëra mijëra të zhdukur ose të mbajtur robër.

Zelensky thotë se Ukraina ‘nuk po humbet’

I pyetur nëse Ukraina po e fitonte luftën aktualisht, Zelensky tha se vendi “nuk po humbiste” dhe argumentoi se Rusia nuk e mbante më iniciativën.

Për Ukrainën, fitorja do të thotë ruajtja e vendit dhe pavarësisë së tij, tha ai, duke shtuar se forcat ruse nuk po arrinin fitoren në fushën e betejës. /rtsh/