Perez, Ancelotti e Modriç: 2025 është viti për gjëra të mëdha

Presidenti i Real Madridit, Florentino Perez foli me tifozët e ‘Los Blancos’ anembanë botës në fjalimin e tij të zakonshëm për Krishtlindje.

Këto janë fjalët e numrit një të madrilenëve, i cili e nisi duke u dërguar një mesazh njerëzve të prekur nga përmbytjet në Valencia ditë më parë.

“Këtë vit dua të mendoj menjëherë për të gjithë njerëzit e prekur nga tragjedia e përmbytjeve. Zemra jonë është me ta dhe unë dua t’u tregoj atyre dashurinë dhe gjithë solidaritetin e klubit tonë. Gjithashtu dua të kujtoj të gjithë njerëzit që vuajnë, Real Madrid dërgon një mesazh shprese”.

“Real Madridi është një ndjenjë që bashkon miliona njerëz që ndihen të identifikuar me vlerat e klubit tonë. Ne ndamë një vit me rezultate të shkëlqyera sportive, përjetuam emocionin e Champions League të pesëmbëdhjetë dhe së bashku do të vazhdojmë të punojmë që ëndrrat e Madridit të bëhen sërish realitet. Gëzuar Krishtlindjet dhe gëzuar 2025 për të gjithë fansat tanë”.

Ndërkaq, trajneri i Realit, Carlo Ancelotti tha se viti që po hyjmë do të jetë vit për të prekur gjerat e mëdha.

“2025 do të jetë një vit për të ëndërruar gjëra të mëdha, do të luftojmë deri në fund në të gjitha garat”, ka theksuar Ancelotti.

Kurse, mesfushori kroat Luka Modriç thotë se Reali në vitin 2025 hynë me objektiva të mëdha.

“Ne kemi synime shumë të mëdha për vitin 2025 dhe kërkojmë nga tifozët të qëndrojnë pranë nesh, sepse pa ata do të ishte e pamundur të luftonim për fitore”, ka pohuar veterani Modriç.