Bournemouth ndal Cityn, Arsenali zyrtarisht kampion i Anglisë

AFC Bournemouth ka mbajtur gjallë ëndrrën për një kualifikim historik në Ligën e Kampionëve, pasi barazoi 1-1 ndaj Manchester City në “Vitality Stadium”, rezultat që i dha matematikisht titullin e Premier League skuadrës së Arsenal FC për herë të parë që nga viti 2004, raporton Rekordi.net.

Ndeshja nisi me ritëm të lartë nga mysafirët e drejtuar nga Pep Guardiola, të cilët kërkonin fitore për ta çuar garën për titull në javën e fundit. Rastin e parë serioz e pati Jérémy Doku pas asistimit të Antoine Semenyo, por portieri Đorđe Petrović reagoi sigurt.

Skuadra vendase paralajmëroi disa herë me Semenyo dhe Evanilson, por golat u anuluan për pozicion jashtë loje. Megjithatë, Bournemouth gjeti avantazhin në pjesën e parë falë talentit Junior Kroupi, i cili realizoi një gol spektakolar me goditje të harkuar pas asistimit të Adrien Truffert.

Në pjesën e dytë, Bournemouth vazhdoi të luante pa frikë ndaj kampionëve në fuqi. Gianluigi Donnarumma u detyrua të intervenonte në disa raste, ndërsa vendasit goditën edhe shtyllën përmes Rayan Cherki dhe më pas David Brooks.

Kur gjithçka dukej e mbyllur, Erling Haaland barazoi në minutat e fundit me një goditje që përfundoi në rrjetë pas prekjes së shtyllës, por City nuk arriti të gjente golin e fitores.

Ky barazim i dha fund zyrtarisht garës për titull, me Arsenalin që shpallet kampion i Anglisë për herë të parë pas 22 vitesh. Ndërkohë, Bournemouth vazhdon serinë fantastike prej 17 ndeshjesh pa humbje në Premier League dhe tashmë ka siguruar të paktën pjesëmarrjen në UEFA Europa League sezonin e ardhshëm, ndërsa një vend në Ligën e Kampionëve mbetet ende i mundur për skuadrën e Andoni Iraola. /Rekordi.net