11 shtatori/ Kullat Binjake “ngrihen” përsëri në qiellin e Nju Jorkut 25 vite pas tragjedisë
Kullat Binjake të Qendrës Botërore të Tregtisë “u rikthyen” në qiellin e Nju Jorkut, 25 vjet pas sulmeve terroriste të 11 Shtatorit 2001, në një spektakël të veçantë me mijëra dronë. Shfaqja, e realizuar nga Sky Elements, përdori 2,977 dronë, ku secili prej tyre simbolizonte një nga viktimat e sulmeve të 11 Shtatorit. Dronët krijuan në qiell siluetat e ndritshme të dy kullave, duke sjellë për pak çaste imazhin e ndërtesave që u shkatërruan më 11 shtator 2001.
Spektakli u zhvillua dy ditë përpara 25-vjetorit të tragjedisë dhe u shfaq në të njëjtën kohë me “Tribute in Light”, dy rrezet tradicionale të dritës që ndriçojnë qiellin mbi Lower Manhattan çdo vit në përkujtim të viktimave. Sulmet e 11 Shtatorit ishin katër sulme terroriste të koordinuara kundër Shteteve të Bashkuara, të kryera nga 19 rrëmbyes të Al-Kaedës.
Në orën 08:46, Fluturimi 11 i American Airlines u përplas me Kullën Veriore të Qendrës Botërore të Tregtisë. Vetëm 17 minuta më vonë, në orën 09:03, Fluturimi 175 i United Airlines goditi Kullën Jugore. Dy kullat 110-katëshe u shembën brenda pak më shumë se një ore, duke shkaktuar një nga tragjeditë më të mëdha në historinë moderne të Shteteve të Bashkuara.
Ndërkohë, Fluturimi 77 i American Airlines u përplas me Pentagonin në orën 09:37, ndërsa Fluturimi 93 i United Airlines u rrëzua pranë Shanksville, Pensilvani, në orën 10:03. Pasagjerët e këtij fluturimi u përpoqën të merrnin kontrollin e avionit dhe e devijuan atë nga objektivi i synuar.
Sulmet e 11 Shtatorit morën jetën e 2,977 njerëzve, pa përfshirë 19 rrëmbyesit, dhe ndryshuan përgjithmonë politikën, sigurinë dhe marrëdhëniet ndërkombëtare. Shfaqja me dronë në Nju Jork shërbeu si një homazh simbolik për secilën prej viktimave. /rtsh/