Temperaturat zbresin deri në -8 gradë, IHMK paralajmëron ngrica dhe borë në Kosovë

Temperaturat zbresin deri në -8 gradë, IHMK paralajmëron ngrica dhe borë në Kosovë

Instituti Hidrometeorologjik i Kosovës (IHMK) ka publikuar parashikimin e motit për pesë ditët e ardhshme, nga 23 deri më 27 nëntor, ku pritet të mbizotërojë mot i ndryshueshëm, me vranësira, reshje shiu dhe rënie të ndjeshme të temperaturave.

Sipas IHMK-së, gjatë kësaj periudhe temperaturat minimale do të zbresin deri në -8 gradë Celsius, ndërsa në viset malore dhe në lartësitë më të mëdha priten edhe reshje bore.

E hënë, 23 nëntor: Moti do të jetë kryesisht i vranët dhe me reshje shiu, ndërsa në viset e larta priten reshje shiu dhe bore. Temperaturat minimale do të lëvizin nga 2 deri në 5 gradë, kurse maksimalet nga 6 deri në 9 gradë Celsius.

E martë, 24 nëntor: Parashihen vranësira të shpërndara dhe intervale me diell. Në orët e mëngjesit do të ketë ngrica dhe mjegull. Temperaturat minimale do të zbresin nga -5 deri në -3 gradë, ndërsa maksimalet do të arrijnë nga 3 deri në 6 gradë Celsius.

E mërkurë, 25 nëntor: Moti do të jetë me diell dhe vranësira të shpërndara, të cilat në disa zona mund të sjellin riga të dobëta shiu. Mëngjesi do të karakterizohet me ngrica, ndërsa temperaturat minimale do të lëvizin nga -8 deri në -4 gradë dhe maksimalet nga 2 deri në 6 gradë Celsius.

E enjte, 26 nëntor: Pritet mot kryesisht i vranët, me mundësi për reshje të herëpashershme shiu. Temperaturat minimale do të jenë nga 0 deri në 3 gradë, ndërsa maksimalet nga 5 deri në 8 gradë Celsius.

E premte, 27 nëntor: Moti do të vazhdojë të jetë kryesisht i vranët, me kushte për reshje shiu. Temperaturat minimale do të lëvizin nga 2 deri në 5 gradë, ndërsa maksimalet nga 5 deri në 9 gradë Celsius.

IHMK bën të ditur se gjatë kësaj periudhe do të ketë edhe mundësi për paraqitjen e mjegullës, veçanërisht në zonat e ulëta dhe luginore, duke ndikuar në dukshmërinë në trafik.

Ndërkohë, ngricat e mëngjesit mund të paraqesin rrezik për kulturat bujqësore të ndjeshme ndaj temperaturave të ulëta, prandaj rekomandohet kujdes i shtuar për pemishtet dhe sipërfaqet bujqësore.

Në përgjithësi, pas rënies së temperaturave në mesin e javës, nga e enjtja pritet një zbutje graduale e motit, por me vazhdim të vranësirave dhe reshjeve të shiut. /Rekordi.net

Share This