Sulmi në Siri, Trump paralajmëron hakmarrje pas vrasjes së amerikanëve

Presidenti amerikan Donald Trump ka paralajmëruar një përgjigje të ashpër ushtarake, pas një sulmi në Siri që u mori jetën dy ushtarëve amerikanë dhe një civili (përkthyes). Ngjarja e rëndë, për të cilën Shtetet e Bashkuara fajësojnë grupin terrorist ISIS, shënon incidentin e parë me viktima amerikane që pas rrëzimit të regjimit të Bashar al-Assad një vit më parë.

“Do të ketë hakmarrje shumë serioze,” shkroi Trump në platformën e tij “Truth Social”, duke e cilësuar ngjarjen si një sulm të ISIS kundër SHBA-së dhe Sirisë, në një zonë që ende nuk kontrollohet plotësisht.

Sulmi ndodhi të shtunën pranë qytetit historik të Palmirës. Komanda Qendrore e SHBA raportoi se një person i armatosur zuri në pritë trupat amerikane, duke vrarë tre persona dhe plagosur tre ushtarë të tjerë, të cilët u evakuuan në garnizonin Al-Tanf. Autori i sulmit u ekzekutua nga forcat amerikane.

Ndërsa SHBA ia atribuoi sulmin ISIS-it, Observatori Sirian për të Drejtat e Njeriut pretendoi se sulmuesi ishte anëtar i forcave të sigurisë siriane. Kjo u sqarua më vonë nga zëdhënësi i Ministrisë së Brendshme të Sirisë, Nour al-Din al-Baba, i cili pranoi se autori ishte pjesë e “Forcës së Sigurisë së Brendshme në shkretëtirë”, por dyshohej për ideologji ekstreme dhe ishte nën hetim para se të kryente sulmin.

Trump zbuloi se kishte komunikuar me Presidentin e ri të Sirisë, Ahmed al-Sharaa, të cilin e përshkroi si të “shkatërruar” dhe “jashtëzakonisht të zemëruar” nga kjo ngjarje. Marrëdhëniet mes dy vendeve kanë ndryshuar rrënjësisht pas rrëzimit të Assadit në dhjetor 2024. Al-Sharaa, dikur rebel me një çmim prej 10 milionë dollarësh mbi kokën e tij, vizitoi Shtëpinë e Bardhë muajin e kaluar, duke shënuar vizitën e parë të një kreu shteti sirian që nga viti 1946.

Reagimi nga Uashingtoni ka qenë i menjëhershëm dhe kërcënues. Sekretari i Mbrojtjes, Pete Hegseth, lëshoi një mesazh të qartë për terroristët:

“Nëse i shënjestroni amerikanët — kudo në botë — do ta kaloni pjesën tjetër të jetës suaj të shkurtër dhe në ankth duke e ditur se Shtetet e Bashkuara do t’ju ndjekin, do t’ju gjejnë dhe do t’ju vrasin pa mëshirë.”

SHBA mban ende qindra trupa në Sirinë lindore dhe në garnizonin Al-Tanf, si pjesë e koalicionit kundër ISIS, grup i cili sipas OKB-së numëron ende 5,000 deri në 7,000 luftëtarë në rajon. /rtsh/