Stuhia e borës përfshin SHBA-të, mbi 5,000 fluturime të anuluara, shpallet gjendja e emergjencës në disa shtete. New York City mbyll rrugët dhe urat

Një stuhi e madhe bore që pritet të jetë më e keqja në gati një dekadë nisi të godasë pjesë të Bregut Lindor të SHBA-së të dielën dhe pritet të vazhdojë deri pasditen e së hënës. Rreth 40 milionë njerëz janë nën paralajmërim për stuhi bore, përfshirë në New York City, Boston, Philadelphia dhe Long Island, ndërsa edhe 19 milionë të tjerë përballen me paralajmërime për stuhi dimërore.

New York City, New Jersey dhe Connecticut janë ndër zonat ku është shpallur gjendje emergjence, me deri në 24 inç borë që pritet të bjerë në disa pjesë të rajonit, sipas Shërbimit Kombëtar të Motit.

Më shumë se 5,000 fluturime brenda, drejt ose nga SHBA-ja janë anuluar sot, sipas faqes së monitorimit të fluturimeve FlightAware. Deri në orën 08:45 GMT (03:45 ET), 5,326 fluturime ishin anuluar për ditën e hënë.

Vendimi vjen pasi janë shpallur gjendje emergjence në disa shtete amerikane, përfshirë Massachusetts, Connecticut, Delaware, New Jersey dhe Rhode Island.

Aeroportet po këshillojnë pasagjerët të kontrollojnë me kompaninë ajrore statusin e fluturimit përpara se të nisen drejt aeroportit.

“Shmangni çdo udhëtim jo të domosdoshëm”, u thuhet banorëve të Nju Jorkut.

New York City, qyteti më i populluar në SHBA ka mbyllur të gjitha rrugët dhe urat për qarkullim jo thelbësor nga ora 21:00 e së dielës (02:00 GMT) deri në mesditën e së hënës (17:00 GMT).

Kryetari i bashkisë, Zohran Mamdani, deklaroi në një konferencë për shtyp të dielën se shkollat do të mbyllen dhe të gjitha rrugët, autostradat dhe urat do të jenë të mbyllura për qarkullim, përveç rasteve emergjente.

Vetëm mjetet thelbësore lejohen në rrugë dhe ura në të pesë lagjet e qytetit, nga ora 21:00 e së dielës deri në orën 12:00 të së hënës.

Ndalimi i udhëtimit përfshin edhe biçikletat elektrike, të cilat përdoren shpesh për shpërndarjen e ushqimit në qytet.

Qyteti është nën paralajmërim për stuhi bore për herë të parë në nëntë vjet, me pritshmëri për 18 deri në 24 inç borë.

“Po u kërkojmë banorëve të Nju Jorkut të shmangin çdo udhëtim jo të domosdoshëm. Ju lutemi, për sigurinë tuaj, qëndroni në shtëpi, brenda dhe larg rrugëve”, tha Mamdani.

Kjo është stuhia e dytë e madhe dimërore që godet qytetin këtë vit, pasi 19 persona humbën jetën gjatë një vale të ftohti trejavore që nisi më 19 janar.