Përshkallëzohet tensioni në kufirin Tajlandë–Kamboxhia, shkelen angazhimet e armëpushimit, rritet bilanci i viktimave

Situata në kufirin mes Tajlandës dhe Kamboxhias është përkeqësuar ndjeshëm, me të paktën shtatë civilë kamboxhianë të cilët janë vrarë dhe rreth 20 të tjerë janë plagosur, sipas autoriteteve në Phnom Penh. Nga pala tajlandeze, ushtria raporton tre ushtarë të vrarë, përfshirë një që humbi jetën nga një hedhës granate, konfirmuan zyrtarët në Bangkok.

Të dyja shtetet akuzojnë njëra-tjetrën për goditje në zona civile. Ushtria tajlandeze pretendon se Kamboxhia ka përdorur sisteme të shumëfishta raketash dhe dronë bombardues në zona të banuara, ndërsa Kamboxhia akuzon Tajlandën për qitje pa dallim në provincën kufitare Pursat.

Të martën, ish-kryeministri kamboxhian Hun Sen deklaroi se vendi i tij ishte detyruar të hakmerrej ndaj sulmeve tajlandeze “mbrëmë dhe këtë mëngjes”, duke theksuar se Phnom Penh-i ka “pritur më shumë se 24 orë për të respektuar armëpushimin”.

Ky është përplasja më e rëndë mes dy vendeve që prej armëpushimit të arritur në korrik, i cili u ndërmjetësua nga presidenti amerikan Donald Trump. Në atë kohë, Trump paralajmëroi se do të pezullonte negociatat tregtare nëse marrëveshja e armëpushimit nuk respektohej. Prej asaj kohe, Uashingtoni ka ritheksuar thirrjet ndaj të dy palëve që të përmbushin plotësisht angazhimet e tyre.

Presidenti i SHBA-së, Donald Trump, u ka bërë thirrje si Tajlandës ashtu edhe Kamboxhias që të “respektojnë plotësisht” armëpushimin e arritur në korrik.

Në korrik, mosmarrëveshja shekullore kufitare midis vendeve të Azisë Juglindore u përshkallëzua në mënyrë dramatike me një breshëri raketash nga Kamboxhia në Tajlandë, e ndjekur nga sulme ajrore tajlandeze. /rtsh/