“Ora po ecën”, Trump paralajmëron Iranin: Duhet të veprojnë shpejt, përndryshe nuk do të mbetet asgjë prej tyre

Presidenti i Shteteve të Bashkuara të Amerikës, Donald Trump, ka lëshuar një paralajmërim të ashpër ndaj Iranit, duke kërkuar që Teherani të arrijë shpejt një marrëveshje paqeje me Uashingtonin ose, sipas tij, do të përballet me “shkatërrim”.

Në një postim në platformën e tij Truth Social, Trump shkroi: “Për Iranin, ora po ecën dhe ata duhet të veprojnë SHPEJT, përndryshe nuk do të mbetet asgjë prej tyre. KOHA ËSHTË THELBËSORE!”

Deklarata vjen në një moment tensionesh të larta në Lindjen e Mesme, ndërsa vazhdon konflikti mes Izraelit dhe Iranit, si edhe luftimet në Liban.

Sipas mediave amerikane, Trump pritet të zhvillojë një takim me këshilltarët më të lartë të sigurisë kombëtare për të diskutuar mundësitë e ndërhyrjes ushtarake ndaj Iranit. Raportimet tregojnë se administrata amerikane po shqyrton skenarë të ndryshëm ndërsa përpjekjet diplomatike për armëpushim mbeten në ngërç.

Ndërkohë, situata në rajon është përshkallëzuar edhe më tej pas një sulmi me dron në Emiratet e Bashkuara Arabe, i cili shkaktoi zjarr në një central bërthamor. Autoritetet e cilësuan incidentin si një “përshkallëzim të rrezikshëm” dhe fajësuan Iranin ose grupet aleate të tij.

Edhe Arabia Saudite raportoi se ka interceptuar tre dronë, duke shtuar frikën për zgjerimin e konfliktit në të gjithë rajonin e Gjirit.

Nga ana tjetër, Teherani ka deklaruar se çdo marrëveshje më e gjerë me SHBA-në do të jetë e mundur vetëm nëse arrihet një armëpushim i qëndrueshëm në Liban.

Ndërkohë, sulmet ajrore izraelite në Liban vazhduan edhe të dielën, duke lënë të paktën shtatë të vrarë, përfshirë një komandant të Xhihadit Islamik, sipas autoriteteve libaneze dhe mediave shtetërore.

Lëvizja Hezbollah reagoi duke i cilësuar bisedimet e ndërmjetësuara nga SHBA-ja mes Libanit dhe Izraelit si një “rrugë pa krye”, çka tregon se shpresat për uljen e tensioneve mbeten të brishta. /rtsh/