Mijëra protestues në Tel Aviv kërkojnë përfundimin e luftës në Gaza dhe lirimin e pengjeve

Rrugët e Tel Avivit u mbushën me dhjetëra mijëra njerëz që demonstronin për t’i dhënë fund luftës në Gaza, pas vendimit të qeverisë Netanyahu për të pushtuar Qytetin e Gazës.

Me pankarta dhe foto të pengjeve në duar, që vazhdojnë të mbahen në enklavën palestineze, ata i bënë thirrje qeverisë të sigurojë lirimin e tyre.

Ndërsa Netanyahu ka thënë se lufta nuk do të përfundojë derisa Hamasi të çarmatoset, shumica e izraelitëve kërkojnë që t’i japë fund menjëherë luftës me një marrëveshje diplomatike që do të përfshinte lirimin e 49 pengjeve të mbetura, 27 prej të cilëve janë të vdekur.

Forumi i Familjeve të Pengjeve, i cili përfaqëson shumë familje të të burgosurve në Gaza, deklaroi se vazhdimi i pushtimit të Gazës do të thotë braktisje e pengjeve dhe injoron mbështetjen publike për një përfundim të menjëhershëm të luftës me një marrëveshje për lirimin e pengjeve.

Vendimi i Izraelit për të zgjeruar luftën e tij në Gaza shkaktoi dënim nga OKB-ja dhe shumë vende, përfshirë Mbretërinë e Bashkuar, Francën, Australinë, Turqinë, Gjermaninë, Finlandën dhe Kanadanë.

OKB-ja ka paralajmëruar se një marrje e plotë e kontrollit nga ushtria do të rrezikonte “pasoja katastrofike” për civilët palestinezë dhe pengjet izraelite të mbajtura në Gaza.

Plani, i miratuar nga kabineti i sigurisë izraelite, liston pesë parime për t’i dhënë fund luftës: çarmatosja e Hamasit, kthimi i të gjithë pengjeve, demilitarizimi i Rripit të Gazës, marrja e kontrollit të sigurisë së territorit dhe krijimi i “një administrate civile alternative që nuk është as Hamasi dhe as Autoriteti Palestinez.