Mbi 68 mijë vota të falsifikuara, Kryeprokurori Kryeziu: E pamundur të bëhej pa ujdi të 4 partive më të mëdha, 109 të ndaluar

Kryeprokurori i Prizrenit, Petrit Kryeziu, në konferencën për media tha se 109 persona janë të ndaluar për veprat penale për falsifikim të rezultateve zgjedhore, dhënie e marrje të ryshfetit dhe kanosje.

“Secili prej atyre që ka guxuar t’i fusë duart në votat e qytetarëve është ballafaquar me forcën e ligjit.Për manipulime brenda llojit aty ku katër subjektet më të mëdha i kanë dërguar të preferuarit e tyre. Mund të kuptoheshin gabimet e vogla të dhjetëra votave. Edhe pse KQZ-ja s’ka ndonjë marzhë tolerance. Këtu bëhet fjalë për mijëra vota të manipuluara e falsifikuara. Pra, ka kandidatë që kanë nga 100-200 e deri mbi 6 mijë vota. Pra, mbi 6 mijë vota janë të flasifikuara për një kandidat. Bëhet fjalë edhe për situata ku vetëm në një vendvotim numri i manipuluar ka shkuar deri mbi 2 mijë vota. Pra, praktikisht në një klasë ku kanë votuar qytetarët”, tha ai.

Në rajonin e Prizrenit, Kryeziu tha se nga ato që janë numëruar nga subjektet politike në QKN është vetëm një vendvotim, pra vetëm një klasë, që s’është keqpërdorur.

“Në komunën e Prizrenit janë shtuar hiç më pak se 40, 497 vota dhe janë hequr hiç më pak se 27,520. Diferenca totale e keqpërdorimeve është 68,017 vota. Po, flasim për një organizim dhe dashje direkte për ta përmbytur rezultatin. Do të ishte e pamundur gjithë këto vota po të mos kishte kompromis të të gjithë komisionerëve atyre që kanë qenë të deleguar nga katër partitë më të mëdha të Kosovës”, tha ai, raporton Express.

Aksioni i Prokurorisë e Policisë në Prizreni nisi pasi procesi i rinumërimit i urdhëruar nga KQZ nxori në pah ndryshime të mëdha të votave të kandidatëve për deputetë brenda partive politike.