Mark Rutte i përgjigjet kërcënimeve të Putinit: Jemi gati të mbrojmë çdo centimetër të territorit tonë

Sekretari i Përgjithshëm i NATO-s, Mark Rutte, ka reaguar ndaj deklaratave kërcënuese të presidentit rus Vladimir Putin, i cili paralajmëroi Evropën për mundësinë e një konflikti të ri, raporton The Guardian.

Rutte theksoi se Aleanca është tërësisht mbrojtëse, por e gatshme të ndërmarrë çdo veprim të nevojshëm për të garantuar sigurinë e qytetarëve të saj dhe mbrojtjen e territorit të vendeve anëtare.

“Në fund, NATO është një aleancë mbrojtëse. Ne do të mbetemi një aleancë mbrojtëse, por mos u gaboni, ne jemi të gatshëm të bëjmë çfarë të duhet për të mbrojtur 1 miliard njerëzit tanë dhe për të siguruar territorin tonë”, tha Rutte.

Deklaratat e kreut të NATO-s vijnë në një periudhë tensionesh të rritura mes Perëndimit dhe Rusisë, ndërsa vendet evropiane po forcojnë bashkëpunimin ushtarak dhe mbështetjen për Ukrainën.