Kane, makineri golash, shifra të frikshme në Bundesligë

Sulmuesi anglez Harry Kane po vazhdon të dëshmojë se është një garanci absolute për Bayern Munich.

Anglez, i transferuar dy vite më parë për 100 milionë euro, po i shpërblen më së miri bavarezët me gola pa fund.

Mbrëmjen e kaluar, në sfidën e parë të sezonit të ri të Bundesligës ndaj Leipzig, Kane shkëlqeu me një tripletë duke marrë me vete topin e ndeshjes për të tetën herë që kur mban veshur fanellën e Bayern-it.

Që nga transferimi i tij, Kane ka shënuar plot 65 gola në 64 ndeshje të Bundesligës, një mesatare që tregon qartë dominimin e tij. Performanca e anglezit dhe loja e Bayern-it kanë dhënë një mesazh të fortë për rivalët, të cilët duket sikur e kanë nisur sezonin tashmë “të dorëzuar”.

Pas ndeshjes, trajneri Vincent Kompany pranoi se u befasua nga paraqitja e Kane.

“Për të qenë i sinqertë, as që e vura re se Kane kishte shënuar tre gola. Nuk e di si mundet të shënojë kaq shumë gola,” tha ai.