Interi mposht Torinon, kalon në gjysmëfinale të Kupës së Italisë

Interi ka siguruar kualifikimin në gjysmëfinale të Kupës së Italisë, pasi ka mposhtur Torinon me rezultat 2-1, në një ndeshje të zhvilluar në stadiumin “U-Power” të Monzës, raporton Rekordi.net.

“Nerazzurrët” arritën fitoren përballë Torinos, në një takim të ndjekur nga afër edhe nga presidenti i FIFA-s, Gianni Infantino, i cili ishte i pranishëm në tribunë. Për shkak se “San Siro” nuk ishte në dispozicion, çerekfinalja u zhvillua rreth 25 kilometra larg Milanos.

Interi e nisi ndeshjen me ritëm më të ngadaltë, por rrezikoi seriozisht në minutën e 20-të, kur Carlos Augusto goditi traversën nga distanca. Goli i avantazhit erdhi në minutën e 35-të, kur 21-vjeçari Issiaka Kamate asistoi saktë për Ange-Yoan Bonny, i cili shënoi me kokë golin e tij të shtatë sezonal.

Vetëm dy minuta pas fillimit të pjesës së dytë, Interi dyfishoi epërsinë. Marcus Thuram shërbeu bukur për Andy Diouf, i cili realizoi golin e dytë për vendasit dhe të tretin personal këtë sezon, të gjithë të shënuar në garat e kupës.

Torino reagoi dhe arriti të ngushtojë rezultatin në minutën e 59-të, kur Sandro Kulenović shënoi golin e tij të parë me fanellën e Torinos, pas një harkimi nga Marcus Holmgren Pedersen. Miqtë u përpoqën të rikthehen në lojë, madje shënuan edhe një gol që u anulua për pozicion jashtë loje.

Deri në fund, Interi ruajti avantazhin dhe siguroi për herë të gjashtë në shtatë sezonet e fundit një vend në gjysmëfinale të Kupës së Italisë.

Në fazën tjetër, skuadra e Simone Inzaghit do të përballet me fituesin e duel it mes Como 1907 dhe Napolit. /Rekordi.net