Hat-trik i Garcias, Reali shkund Betisin

Real Madridi ka regjistruar fitoren e tretë radhazi në LaLiga, duke mposhtur bindshëm Real Betisin me rezultat 5-1, të dielën në “Santiago Bernabeu”.

Protagonist absolut i takimit ishte Gonzalo Garcia, i cili realizoi hat-trik, duke i dhënë skuadrës së tij tri pikë të rëndësishme dhe duke e afruar në katër pikë diferencë me liderin Barcelona.

Skuadra e Xabi Alonso-s e nisi ndeshjen me intensitet të lartë, duke ushtruar presion të vazhdueshëm në minutat e para. Federico Valverde dhe Vinicius Junior krijuan vazhdimisht probleme për mbrojtjen mysafire, ndërsa goli i parë erdhi në minutën e 20-të, kur Gonzalo Garcia shënoi me kokë pas një goditjeje të lirë nga Rodrygo, duke realizuar golin e tij të parë në LaLiga me fanellën madrilene.

Real Madridi dominoi posedimin dhe ritmin e lojës gjatë gjithë pjesës së parë, me Jude Bellingham dhe Aurelien Tchouaméni që kontrolluan mesfushën. Betisi u mbrojt mirë në disa momente, por rrallë arriti të rrezikojë seriozisht portën e Courtois.

Në pjesën e dytë, vendasit e mbyllën shpejt ndeshjen. Gonzalo Garcia realizoi golin e dytë me një goditje të bukur volej, ndërsa Raul Asencio shënoi golin e tretë me kokë nga këndi. Edhe pse Betisi pati disa raste dhe arriti të shënojë një gol nderi, shpresat për rikthim u shuan përfundimisht kur Gonzalo Garcia kompletoi hat-trikun me një goditje elegante me thembër.

Fran Garcia vulosi rezultatin përfundimtar 5-1 në minutat shtesë.

Me këtë fitore, Real Madridi mbetet i pamposhtur në shtatë përballjet e fundit në shtëpi ndaj Betisit, ndërsa skuadra e Manuel Pellegrinit mbetet në vendin e gjashtë dhe humb mundësinë për t’u afruar me zonën e Evropës.