Barcelona spektakolare, mposht Betisin në një ndeshje dramatike

Barcelona ka vazhduar formën e jashtëzakonshme në LaLiga, duke triumfuar me rezultat të thellë 5-3 ndaj Real Betis në “Estadio Benito Villamarín”, një përballje plot emocione, ritëm dhe gola, shkruan Rekordi.net.

Kjo fitore e çon Barcelonën në tetë fitore nga dhjetë ndeshjet e fundit direkte kundër Betisit, duke mbetur e pathyeshme ndaj andaluzianëve që nga marsi i vitit 2008.

Ndeshja nisi furishëm, me Betisin që gjeti golin që në minutën e pestë përmes Antony, i cili shfrytëzoi hutimin e mbrojtjes katalane. Megjithatë, reagimi i Barcelonës ishte i menjëhershëm. Ferran Torres ishte protagonisti kryesor, duke barazuar rezultatin me një goditje të saktë dhe vetëm pak çaste më vonë, me një volej akrobatik, përmbysi gjithçka në favor të blaugranave.

Dominimi i Barcelonës vazhdoi, me Roony Bardghji që realizoi golin e tij të parë në LaLiga pas një depërtimi individual të shkëlqyer. Para pushimit, një devijim i Bartrës pas goditjes së Ferranit rriti epërsinë në 4-1 për catalanasit.

Në pjesën e dytë, Barcelona vazhdoi presionin, me Lamine Yamal që humbi disa raste të pastra, para se të shënonte nga penalltia pas një vendimi tejet të diskutueshëm nga VAR-i.

Betisi arriti të shënojë dy herë në minutat e fundit përmes Diego Llorentes dhe Cucho Hernández, por golat vetëm sa e zbukuruan rezultatin, pasi ndeshja tashmë ishte e vulosur.

Me këtë fitore, Barcelona e forcon pozitën si lidere e LaLigës dhe vazhdon e pamposhtur në transfertë kundër Betisit për 17 vite rresht.

Në anën tjetër, Betis mbetet në krizë forme dhe pa zgjidhje për t’u përballur me ofensivën e fuqishme të katalanasve. /Rekordi.net