Atalanta mposht Romën në derbin italian

Kthimi i Gian Piero Gasperinit në Bergamo nuk solli gëzim për trajnerin italian, pasi Roma pësoi humbje 1-0 nga Atalanta, duke regjistruar humbjen e tretë radhazi në transfertë në Serie A.

Ndërkohë, Atalanta shënoi fitoren e katërt në pesë ndeshjet e fundit në Seria A.

Roma nisi me një rast të hershëm kur Paulo Dybala shfrytëzoi një pasim të gabuar të Ederson dhe asistoi për Evan Ferguson, i cili goditi, por portieri Marco Carnesecchi dhe më pas Berat Djimsiti neutralizuan përpjekjen.

Pesë minuta më vonë, Atalanta kaloi në avantazh kur një krosim nga Nicola Zalewski u devijua nga Mile Svilar, dhe Giorgio Scalvini shënoi pas një verifikimi të gjatë nga VAR-i, duke vulosur rezultatin 1-0.

Gjatë pjesës së dytë, Roma provoi të reagojë, me Ferguson dhe Matias Soule që krijuan rreziqe për portën e Carnesecchi, por pa sukses.

Atalanta kontrolloi ritmin e lojës dhe rrezikoi sërish përmes Bernasconit dhe Krstovicit, ndërsa përpjekjet më të mira të Romës, përfshirë një bicikletë nga Dybala, nuk sollën rezultatin e barazimit.

Kjo humbje e katërt në gjashtë ndeshje vendos Romën në një situatë të vështirë në garën për titull, të gjitha humbjet duke ardhur me diferencë të vetëm një goli.

Për Atalantën, kjo është fitorja e katërt në pesë ndeshjet e fundit, duke konfirmuar formën e mirë në shtëpi.