Ukraina rifillon sulmet ndaj objekteve ruse të naftës

Ukraina i dha një tjetër goditje industrisë së naftës së Rusisë gjatë natës, duke lëshuar dronë në një depo magazinimi pranë qytetit jugor të Taganrogut në detin Azov dhe një rafineri në Saratov në lumin Vollga, thanë sot raporte të ndryshme.

Autoritetet ruse konfirmuan pjesërisht sulmet, të cilat u raportuan edhe nga media ukrainase.

Sulmet duket se kanë pasur pasoja veçanërisht të rënda në Saratov, duke gjykuar nga imazhet që qarkullojnë në internet.

“Sipas informacioneve paraprake, ka dëme në infrastrukturën civile”, shkroi guvernatori i Saratovit, Roman Busargin, në Telegram, pa dhënë detaje.

Rafineria i përket kompanisë shtetërore të naftës ”Rosneft”, e cila drejtohet nga Igor Sechin, një njeri i besuar i presidentit rus Vladimir Putin.

Objekti është shënjestruar më parë në fushatën ajrore në rritje të Ukrainës brenda Rusisë.

Guvernatori i rajonit të Rostovit, Yury Slyusar, konfirmoi në Telegram se një depo nafte pranë Taganrogut në rrethin Matveyev-Kurgan ishte ende në flakë.

”Operacionet e shuarjes së zjarreve ishin në vazhdim pas një sulmi masiv nga dronë ukrainas, 50 prej të cilëve u shkatërruan nga mbrojtja ajrore”, tha ai.

Sipas ushtrisë ruse, më shumë se 200 dronë ukrainas u kapën gjatë natës.

Sulmet me dronë nga të dyja palët janë bërë një dukuri e përditshme që kur Putin urdhëroi pushtimin në shkallë të plotë të Ukrainës në shkurt 2022.

Rrezja e sulmeve të Kievit ndaj infrastrukturës ruse të naftës dhe vendeve të prodhimit ushtarak është rritur ndjeshëm në muajt e fundit, ndërsa teknologjia e dronëve të Ukrainës është përmirësuar. /atsh/