Trump ngre padi për shpifje prej 5 miliardë dollarësh kundër BBC-së

Presidenti amerikan Donald Trump ka ngritur një padi prej 5 miliardë dollarësh kundër BBC-së për një redaktim të fjalimit të tij të 6 janarit 2021 në një dokumentar të publikuar në revistën televizive Panorama.

Trump akuzoi transmetuesin për shpifje dhe për shkelje të një ligji të praktikave tregtare, sipas dokumenteve gjyqësore të paraqitura në Florida.

BBC i kërkoi falje Trump muajin e kaluar, por hodhi poshtë kërkesat e tij për kompensim dhe nuk ra dakord se kishte ndonjë “bazë për një pretendim për shpifje”.

Ekipi ligjor i Trump akuzoi BBC-në për shpifje dhe se ka “manipuluar qëllimisht, fjalimin e tij”. BBC ende nuk i është përgjigjur padisë.

Trump tha muajin e kaluar se planifikonte të padiste BBC-në për dokumentarin, i cili u transmetua në Mbretërinë e Bashkuar përpara zgjedhjeve amerikane të vitit 2024.

Në fjalimin e tij më 6 janar 2021, para një trazire në Kapitolin e SHBA-së, Trump i tha një turme: “Ne do të zbresim në Kapitol dhe do të brohorasim për senatorët tanë të guximshëm dhe kongresmenët dhe gratë”.

Më shumë se 50 minuta më vonë në fjalim, ai tha: “Dhe ne luftojmë. Ne do luftojmë si dreqi.”

Në programin Panorama, një klip e tregoi atë duke thënë: “Ne do të zbresim në Kapitol… dhe unë do të jem atje me ju. Dhe ne luftojmë. Ne do luftojmë si dreqi.”

BBC pranoi se redaktimi kishte dhënë “përshtypjen e gabuar” se ai kishte “bërë një thirrje të drejtpërdrejtë për veprim të dhunshëm”, por nuk ishte dakord se kishte bazë për një pretendim për shpifje.

Në nëntor, një memo e brendshme e BBC-së kritikoi mënyrën se si u redaktua fjalimi dhe çoi në dorëheqjen e drejtorit të përgjithshëm të BBC-së, Tim Davie, dhe shefes së saj të lajmeve, Deborah Turness.

Para se Trump të ngrinte padinë, avokatët e BBC kishin dhënë një përgjigje të gjatë ndaj pretendimeve të presidentit. Ata thanë se nuk kishte dashakeqësi në redaktim dhe se Trump nuk u dëmtua nga programi, pasi ai u rizgjodh President.

Ata gjithashtu thanë se BBC nuk kishte të drejta për të shpërndarë programin Panorama në kanalet e saj amerikane.

Në padinë e tij, Trump citon marrëveshjet që BBC kishte me shpërndarës të tjerë për të shfaqur përmbajtje, veçanërisht një me një korporatë mediatike të palës së tretë që dyshohet se kishte të drejta licencimi për dokumentarin jashtë Mbretërisë së Bashkuar. /rtsh/