Të shtënat në shkollën katolike, FBI nis hetimet për terrorizëm dhe krim urrejtjeje. Flamuri amerikan ulet në gjysmështizë

Dy fëmijë u qëlluan për vdekje dhe 17 të tjerë u plagosën nga të shtënat me armë në shkollën katolike të Kishës së Ungjillizimit në Mineapolis, SHBA.

Ngjarja tronditi gjithë komunitetin, ndërsa FBI-ja po e heton ngjarjen si akt terrorizmi dhe krim urrejtjeje ndaj katolikëve.

Guvernatori Tim Walz tha se Presidenti Donald Trump dhe ekipi i tij shprehën ngushëllimet për tragjedinë, ndërsa njoftuan se flamuri amerikan do të ulet në gjysmështizë në Shtëpinë e Bardhë si shenjë respekti për viktimat.

Në një deklaratë të rrallë në rrjetin social X , zonja e parë Melania Trump theksoi “nevojën për ndërhyrje parandaluese në identifikimin e personave të mundshëm që mund të përdorin armë në shkolla”.

Trump shkroi se shenjat e hershme paralajmëruese “janë shpesh të dukshme, me shumë individë që shfaqin sjellje shqetësuese dhe bëjnë kërcënime të dhunshme në internet përpara veprimeve të tyre”.

“Për të parandaluar tragjeditë e ardhshme, është thelbësore që të shqyrtojmë vlerësimet e kërcënimeve të sjelljes në të gjitha nivelet e shoqërisë – duke filluar në shtëpitë tona, duke u zgjeruar nëpër distriktet shkollore dhe sigurisht, platformat e mediave sociale. Të qenit i vetëdijshëm për këto shenja paralajmëruese dhe të vepruarit shpejt mund të shpëtojë jetë dhe t’i bëjë komunitetet amerikane më të sigurta”, shkroi Trump në postimin e saj.

Ditën e djeshme një 23-vjeçar iu afrua anës së kishës, ku ndodhet shkolla, dhe qëlloi dhjetëra herë përmes dritareve, duke përdorur tri armë zjarri.

Nga të shtënat humbën jetën dy fëmijë të moshave 8 dhe 10 vjeç, ndërsa 17 të tjerë (14 fëmijë dhe 4 famullitarë të moshuar) u plagosën, teksa ishin duke kremtuar meshën.

Autori i ngjarjes, i identifikuar si 23-vjeçari Robin Westman, humbi jetën në vendngjarje pasi u vetëqëllua me plumb. /rtsh/