SHBA kërcënon me tarifa të reja rreth 60 partnerë tregtarë për çështjen e “punës së detyruar”

Presidenti i SHBA-së Donald Trump ka propozuar vendosjen e tarifave doganore që variojnë nga 10% deri në 12.5% ndaj rreth 60 partnerëve tregtarë ndërkombëtarë, mes tyre Mbretëria e Bashkuar, Bashkimi Evropian, Australia, Kanadaja dhe vende të tjera të mëdha ekonomike. Masa lidhet me pretendime për dështimin e këtyre vendeve për të adresuar importet e mallrave të prodhuara me “punë të detyruar” që dyshohet se janë prodhuar me shkelje të të drejtave të njeriut.

SHBA po justifikon tarifat duke thënë se disa vende nuk po bëjnë mjaftueshëm për të ndaluar importimin e mallrave që janë prodhuar me “punë të detyruar”.

Sipas administratës amerikane, kjo politikë synon të godasë zinxhirët globalë të furnizimit që, sipas Uashingtonit, përfitojnë nga kushte të padrejta pune dhe krijojnë konkurrencë të pabarabartë për punëtorët amerikanë.

Zëdhënësi i tregtisë së SHBA-së, Jamieson Greer, deklaroi se “dështimi i partnerëve kryesorë tregtarë për të adresuar importet e mallrave të prodhuara me punë të detyruar është i papranueshëm”, duke shtuar se kjo krijon një disavantazh të padrejtë në tregjet globale.

Nga ana tjetër, Bashkimi Evropian reagoi menjëherë, duke theksuar se pret respektimin e marrëveshjeve ekzistuese tregtare me SHBA-në dhe duke argumentuar se tarifat e reja bien ndesh me frymën e bashkëpunimit ekonomik.

Masat e reja pritet të prekin gjithashtu ekonomi të mëdha si Kanadaja, Mbretëria e Bashkuar, Australia, Japonia, Norvegjia, Tajvani, Kina dhe Brazili, i cili sipas planeve të SHBA-së mund të përballet edhe me tarifa shtesë deri në 25%. /rtsh/