Specialja ua vazhdon paraburgimin Veselit dhe Krasniqit, një ditë para aktgjykimit

Një ditë para shpalljes së aktgjykimit në Hagë, Kadri Veselit dhe Jakup Krasniqit u është vazhduar paraburgimi edhe për dy muaj.

Vendimin e ka marrë gjyqtari Charles Smith, ndërsa lajmin e ka bërë me dije gazetarja e Klan Kosovës, Rina Mujku, e cila po raporton nga Haga.

Sipas saj, vendimi është marrë të martën, pasi më 15 korrik ishte marrë vendimi i fundit për vazhdimin e paraburgimit të tyre.

Mujku ka bërë të ditur se bëhet fjalë për një çështje procedurale, pasi e marta ishte afati i fundit për marrjen e një vendimi të ri për paraburgimin.

Ajo ka theksuar se Smith kishte mundësi që vendimin ta merrte edhe pas shpalljes së aktgjykimit, i cili pritet të shpallet nesër.

Ndërkohë, ende nuk ka afate të tjera për të mësuar nëse do të ketë vendim të ri për paraburgimin e Hashim Thaçit dhe Rexhep Selimit.

Nesër në Hagë pritet të shpallet aktgjykimi ndaj Hashim Thaçit, Kadri Veselit, Rexhep Selimit dhe Jakup Krasniqit.