SHBA-Britani, pritet nënshkrimi i marrëveshjes për energjinë bërthamore

Britania e Madhe dhe SHBA-të pritet të nënshkruajnë një marrëveshje që synon përshpejtimin e zhvillimit të energjisë bërthamore.

Marrëveshja synon të krijojë mijëra vende pune dhe të forcojë sigurinë energjetike të Britanisë.

Pritet që marrëveshja të miratohet gjatë vizitës shtetërore të Presidentit të SHBA-së, Donald Trump, këtë javë, me të dyja palët që shpresojnë se do të zhbllokojë miliarda dollarë investime private.

Siç shkruan Reuters, Britania shpreson gjithashtu të finalizojë tarifat e çelikut nën një marrëveshje tregtare shumëpritur.

Fokusi kryesor i të ashtuquajturit Partneritet Atlantik për Energji Bërthamore të Avancuar është ta bëjë më të shpejtë për kompanitë ndërtimin e centraleve të reja bërthamore si në Mbretërinë e Bashkuar ashtu edhe në SHBA.

Qeveria britanike synon që kjo pritje madhështore të ndihmojë në forcimin e lidhjeve në mbrojtje, siguri dhe energji me Washingtonin.

Kryeministri Starmer do të presë Trumpin në rezidencën Chequers për të diskutuar bashkëpunimin mbi çështje si Ukraina dhe për të finalizuar tarifat më të ulëta për çelikun dhe aluminin.

Zyrtarët britanikë paralajmërojnë finalizimin e një “partneriteti teknologjik të nivelit botëror” dhe marrëveshje miliardëshe për projekte bërthamore të vogla, që mund të furnizojnë edhe qendra të reja të Inteligjencës Artificiale.

Para mbërritjes së Trump, Britania njoftoi investime amerikane prej mbi 1.25 miliardë paundësh nga PayPal, Bank of America dhe të tjerë. Nvidia dhe OpenAI pritet të investojnë në Mbretërinë e Bashkuar e po ashtu edhe kompania CoreWeave.

Vizita e Trump vjen pas shkarkimit të ambasadorit britanik në SHBA, Peter Mandelson, për lidhjet e tij me Jeffrey Epstein, një vendim që i ka sjellë shqetësime kryeministrit Starmer.

Si pjesë e marrëveshjes, do të njoftohen edhe projekte për thellimin e lidhjeve kulturore, përfshirë promovimin e basketbollit dhe partneritete midis institucioneve të trashëgimisë dhe artit.

Programi bërthamor i Mbretërisë së Bashkuar përfshin tashmë plane për reaktorë të vegjël modularë (SMR), të cilët janë një version i zvogëluar i centraleve më të mëdha. Firma inxhinierike britanike Rolls Royce është përzgjedhur për të projektuar dhe ndërtuar të parin në vend.

Sekretari i Energjisë Ed Miliband tha: “Energjia bërthamore do të furnizojë shtëpitë tona me energji të pastër dhe të prodhuar në vend dhe sektori privat po e ndërton atë në Britani, duke sjellë rritje dhe vende pune të kualifikuara dhe të paguara mirë për njerëzit që punojnë.” /rtsh/