Sekuestrohet sasia rekord prej 2.7 tonë kokainë në Australi

Policia australiane ka realizuar sekuestrimin më të madh të kokainës në historinë e vendit, duke gjetur 2.7 tonë lëndë narkotike të fshehur në një sistem bunkerësh nëntokësorë në Sidnein perëndimor. Droga, e cila kap një vlerë të vlerësuar në tregun e rrugës prej 816 milionë dollarësh australianë (500 milionë euro), u zbulua të premten në ndarje të fshehura nën dysheme të rreme në tre kontejnerë transporti në një pronë në Londonderry.

Gjatë operacionit u arrestuan dy burra të moshës 21 dhe 25 vjeç, të cilët tentuan t’i iknin policisë. Ata u paraqitën në gjykatë dhe u lanë në paraburgim nën akuzën e posedimit të një sasie komerciale të një droge të importuar në mënyrë të paligjshme, vepër e cila dënohet me burgim të përjetshëm.

Operacioni “Minjiang” dhe rrjeti i shtrirë

Sipas autoriteteve, ngarkesa u kontrabandua në Australi nëpërmjet qytetit të vogël Midge Point në Queenslandin Verior, me urdhër të një grupi të krimit të organizuar. Ndërhyrja në Londonderry ishte pjesë e “Operacionit Minjiang”, i cili nisi në maj pas gjetjes së 40 kg kokainë që notonin në ujë pranë një rampe varkash në Midge Point.

Deri më tani, hetimet kanë çuar në arrestimin e gjashtë personave të tjerë në Queensland dhe New South Wales, ndërsa një “anije mëmë” e dyshuar si pjesë e këtij rrjeti është ndaluar në Ishujt Solomon.

Komandanti i Policisë Federale Australiane, Stephen Jay, nënvizoi shkallën e lartë të organizimit të këtij rrjeti:

“Ky komplot i dyshuar tregon se sa shumë të organizuara dhe të vendosura janë këto rrjete kriminale dhe sa larg janë të gatshëm të shkojnë në ndjekje të fitimit.”

Australia si treg me fitim të lartë

Pavarësisht distancës gjeografike, Australia mbetet një treg mjaft fitimprurës për trafikun ndërkombëtar të lëndëve narkotike. Të dhënat nga sistemi i monitorimit të drejtuar nga Universiteti i Uellsit të Ri Jugor tregojnë se një gram kokainë në vend shitet zakonisht rreth 300 dollarë australianë.

Po ashtu, Raporti Botëror i OKB-së për Drogën i vitit të kaluar evidenton se konsumatorët në Australi dhe Zelandën e Re kanë nivelet më të larta të përdorimit të kokainës në rang global. Policia Federale konfirmoi se po vijon punën me partnerët vendas dhe ndërkombëtarë për të përcaktuar origjinën e saktë të drogës dhe për të identifikuar personat e tjerë të përfshirë në këtë sindikatë kriminale. /rtsh/