Reali në gjysmëfinale të Kupës së Botës për Klube, eliminon Dortmundin në një dramatike

Real Madridi është gjysmëfinalisti i katërt dhe i fundit i Kupës së Botës për Klube, pas një fitoreje dramatike 3:2 ndaj Borussia Dortmundit në çerekfinale, raporton Rekordi.net.

“Los Blancos” e nisën fuqishëm ndeshjen dhe e mbyllën pjesën e parë me epërsi të dyfishtë. Goli i parë erdhi në minutën e 10-të, kur Gonzalo Garcia shënoi bukur pas një asistimi nga Arda Guler. Vetëm dhjetë minuta më pas, ishte radha e Fran Garcias që të gjente rrjetën, këtë herë pas një pasimi preciz nga Trent Alexander-Arnold.

Pjesa e dytë kaloi pa shumë ngjarje, derisa minuta shtesë sollën dramë të vërtetë në fushë. Beier ngushtoi rezultatin për Dortmundin në minutën e 90+2, duke rihapur përkohësisht sfidën. Por Kylian Mbappe, me një gol spektakolar me volej, e riktheu epërsinë e dy golave për Realin vetëm dy minuta më vonë.

Drama nuk përfundoi këtu. Në minutën e 90+8, Dean Huijsen u ndëshkua me karton të kuq pas një ndërhyrjeje ndaj Guirassy. Ky i fundit realizoi penalltinë, duke e çuar rezultatin në 3:2, por pa arritur të ndryshojë fatin e ndeshjes.

Real Madridi siguron kështu një biletë për në gjysmëfinale, ku do të përballet me Paris Saint-Germain, kampionin aktual të Europës, i cili më herët eliminoi Bayern Munichun.

Përballja Real Madrid – PSG premton spektakël absolut në rrugën drejt finales. /Rekordi.net