Raportohet se BBC do të shkurtojë 2,000 vende pune mes presioneve financiare

BBC pritet të shkurtojë rreth 2,000 vende pune, raportuan të mërkurën mediat britanike, duke e cilësuar si raundin më të madh të reduktimeve në korporatë që prej gati 15 vitesh.

Lajmi u publikua nga ITV News dhe Press Association, ndërsa BBC nuk ka konfirmuar ende planin dhe nuk ka dhënë koment zyrtar.

Sipas Financial Times, rreth një në dhjetë punonjës mund të humbasin vendin e punës, me njoftimin që pritet të bëhet publik në një mbledhje të përgjithshme të stafit.

Aktualisht, BBC punëson mbi 21,500 persona në Mbretërinë e Bashkuar.

Shkurtimet lidhen me planin e prezantuar në shkurt për të ulur kostot me rreth 10% në tre vitet e ardhshme, ose afërsisht £500 milionë (678 milionë dollarë), përballë presioneve të mëdha financiare.

Vetëm vitin e kaluar, shpenzimet e shërbimit publik të BBC kapën mbi £4 miliardë.

Reduktimet vijnë në një moment tranzicioni drejtues, pasi Matt Brittin, ish-ekzekutiv i Google, pritet të marrë drejtimin e korporatës pas largimit të Tim Davie në prill.

Davie dha dorëheqjen pas polemikave të shkaktuara nga një klip i redaktuar i programit BBC Panorama që përfshinte presidentin amerikan Donald Trump, i cili më pas paditi korporatën për 10 miliardë dollarë.

Brittin pritet të përballet me një axhendë të vështirë, përfshirë pyetje mbi mbulimin e luftës në Gaza, si dhe konkurrencën e fortë nga platformat e transmetimit online dhe ndikimi në rritje i YouTube. /rtsh/