Pikat kufitare pa kolona, pritjet në Merdarë deri në 20 minuta

Qendra Kombëtare për Menaxhimin Kufitar ka publikuar të dhënat më të fundit mbi fluksin e mjeteve në pikat e kalimit kufitar, të përditësuara në orën 08:10 të mëngjesit të sotëm.

Sipas të dhënave, situata në të gjitha pikat kufitare paraqitet e qetë, me pritje minimale për kalim. Në shumicën e pikave kufitare, pritjet për automjete si në hyrje ashtu edhe në dalje variojnë nga 3 deri në 5 minuta.

Disa përjashtime janë vërejtur në pikat kufitare Dheu i Bardhë dhe Jarinje, ku pritjet shkojnë deri në 10 minuta, si dhe në pikën kufitare Merdarë, ku pritja në dalje arrin deri në 20 minuta.

Për sa i përket qarkullimit të kamionëve, të gjitha pikat kufitare raportojnë kohë të njëjta pritjeje prej 3-5 minutash si në hyrje ashtu edhe në dalje, pa ndonjë kolonë të raportuar.