Drita mëson kundërshtarin e mundshëm në ‘play-off’ të Conference League

FC Drita ka mësuar kundërshtarin e mundshëm në fazën e play-off-it të garave evropiane, nëse arrin të kalojë me sukses pengesën e radhës.

Kampionia e Kosovës do të përballet fillimisht me Tre Fiori të San Marinos në raundin e tretë kualifikues. Në rast të kualifikimit, Drita do të sfidojë fituesin e çiftit mes Flora Tallinn nga Estonia dhe Inter Escaldes nga Andorra për një vend në fazën e grupeve.

Drita është përfaqësuesja e vetme e futbollit kosovar që vazhdon garën në Evropë këtë sezon, pasi Ballkani, Dukagjini dhe Malisheva u eliminuan në raundin e dytë kualifikues.

Klubi gjilanas synon ta përsërisë suksesin e sezoneve të fundit, duke siguruar për të tretin vit radhazi pjesëmarrjen në fazën e grupeve të një gare evropiane.

Ky objektiv vjen në një moment jo të lehtë për Dritën, e cila së fundmi u nda nga trajneri Zekirija Ramadani. Megjithatë, skuadra mbetet e fokusuar për të vazhduar rrugëtimin evropian dhe për të shkruar një tjetër kapitull të rëndësishëm në historinë e klubit.

Ndeshja e parë ndaj Tre Fiorit do të zhvillohet të enjten e ardhshme, ndërsa takimi i kthimit është planifikuar një javë më vonë. Vetëm pas kalimit të kësaj sfide, Drita do të ketë mundësinë të luftojë për një vend në fazën e grupeve ndaj fituesit të përballjes Flora Tallinn – Inter Escaldes.