Parashikimi i motit për 1 Maj në Kosovë e Shqipëri

Instituti Hidrometeorologjik i Kosovës (IHMK) ka njoftuar se të premten, më 1 Maj 2026, në Kosovë pritet të mbajë mot kryesisht me diell në orët e mëngjesit, por me temperatura të ulëta dhe mundësi për ngrica lokale.

Sipas IHMK-së, gjatë ditës do të ketë vranësira të pjesshme, ndërsa temperaturat minimale do të lëvizin nga 0 deri në 3 gradë Celsius, kurse maksimalet nga 11 deri në 13 gradë Celsius.

Era do të fryjë nga veriperëndimi me shpejtësi 1 deri në 4 metra për sekondë.

IHMK ka bërë të ditur se gjatë javës që lamë pas, mbi territorin e Kosovës ka dominuar një regjim atmosferik relativisht i paqëndrueshëm, si pasojë e depërtimit të masave ajrore më të freskëta nga veriu dhe verilindja e kontinentit.

Nga aspekti agrometeorologjik, instituti paralajmëron se temperaturat minimale të ulëta, që në disa zona mund të zbresin deri në 0°C, paraqesin rrezik për ngrica të vonshme, të cilat mund të ndikojnë në kulturat bujqësore.

Ndërkohë, edhe në Shqipëri pritet mot i paqëndrueshëm. Shërbimi Meteorologjik Ushtarak ka njoftuar se të premten kushtet atmosferike do të jenë të ndryshueshme, me erë që do të fryjë nga verilindja dhe veriu me shpejtësi mesatare rreth 9 m/s. Në lugina dhe përgjatë bregdetit, era herë pas here mund të arrijë deri në 19 m/s, ndërsa valëzimi në det pritet të jetë 3 deri në 4 ballë.

Sa i përket temperaturave në Shqipëri, më e ulëta pritet të regjistrohet në Dibër, nga 1 deri në 11 gradë Celsius, ndërsa më e larta në Vlorë, nga 11 deri në 21 gradë Celsius.