Haradinaj kërkon konsultë mes partive politike para seancës së Kuvendit

Lideri i Aleancës për Ardhmërinë e Kosovës (AAK), Ramush Haradinaj, ka njoftuar se partia e tij do të kërkojë një konsultë mes partive politike para fillimit të seancës së sotme të Kuvendit.

Sipas tij, qëllimi i kësaj konsultimi është diskutimi për kandidaturat për kryetar të Kuvendit.

“Përmes koleges sonë, Timës, që është shefe e grupit parlamentar, do të kërkojmë një konsult para seancës me shefat e grupeve dhe me kryesuesin. Nëse ka gatishmëri edhe në nivel të kryetarëve të partive, që të diskutojmë për kandidaturat. Pra, kush mundet me qenë një kandidaturë unifikuese. Është e vërtet që pos emra që kemi cek, mund të ketë edhe të tjerë që mund ta marrin votën tonë,” tha Haradinaj.

AAK ka theksuar se është e hapur për diskutime, duke lënë të kuptohet se përveç emrave të përmendur më herët, mund të mbështesë edhe kandidatë të tjerë që do të siguronin konsensus mes partive politike.