Getafe turpëron Real Madridin midis ‘Bernabeut’

Getafe ka shkaktuar një nga befasitë më të mëdha të sezonit në La Liga, duke mposhtur 1-0 Real Madrid në “Santiago Bernabeu” – fitorja e parë e mysafirëve në këtë stadium që nga viti 2008, raporton Rekordi.net.

Skuadra mysafire, e cila kishte humbur 16 ndeshjet e fundit të kampionatit në këtë stadium, u paraqit me kujdes që nga minuta e parë, por pati edhe fatin në anën e saj falë portierit David Soria.

Vinicius Junior shfrytëzoi një gabim të Sebastian Bosellit, por u ndal nga ndërhyrja vendimtare e portierit mysafir. Edhe Arda Guler rrezikoi me një goditje në shtyllën e parë, por pa sukses.

Megjithatë, befasia erdhi në minutat e fundit të pjesës së parë. Pas një krosimi në zonë, mbrojtësit madrilenë nuk arritën të largonin topin si duhet dhe Martin Satriano realizoi një super-goditje fluturimthi, duke e dërguar topin në cepin e sipërm të portës për 1-0.

Ishte goli i parë i Getafes ndaj Realit pas pesë përballjeve dhe vetëm goli i dytë i tyre në pjesën e parë në 18 ndeshje të fundit kampionale.

Në pjesën e dytë, madrilenët shtuan presionin dhe tentuan të reagojnë përmes zëvendësimeve. Dean Huijsen dhe Rodrygo nuk arritën të konkretizojnë disa krosime të rrezikshme, ndërsa mbrojtja e Getafes, e udhëhequr nga Domingos Duarte, rezistoi me disiplinë të lartë. Soria vazhdoi me pritje vendimtare për të ruajtur avantazhin minimal.

Në sekondat e fundit, situata u tensionua edhe më shumë kur Franco Mastantuono u ndëshkua me karton të kuq për protesta, duke ia shtuar dhimbjen Realit.

Edhe Adrian Liso u përjashtua në fund për goditje të topit pas fishkëllimës, por kjo nuk e zbehu festën e mysafirëve.

Pas kësaj humbjeje, Real Madridi mbetet katër pikë prapa kreut të tabelës, pasi FC Barcelona kishte fituar 4-1 ndaj Villarreal CF më herët gjatë xhiros.

Në anën tjetër, Getafe largohet tetë pikë nga zona e rënies me 12 ndeshje të mbetura, duke bërë një hap të madh drejt mbijetesës. /Rekordi.net