Abdixhiku nga Bregu i Diellit: Prishtina meriton qeveri që e zhvillon, jo që e bllokon

Kryetari i Lidhjes Demokratike të Kosovës (LDK), Lumir Abdixhiku, ka vizituar lagjen Bregu i Diellit në Prishtinë, ku është takuar me qytetarë dhe simpatizantë të kësaj partie, duke përcjellë mesazhe kritike ndaj Qeverisë aktuale dhe premtime për zhvillimin e kryeqytetit.

Nga ky takim, Abdixhiku ka ndarë edhe një video në rrjetet sociale, ku shihet i rrethuar nga mbështetës të LDK-së, teksa flet për nevojën që Prishtina të ketë një qeverisje që nuk e bllokon dhe nuk e saboton zhvillimin e saj.

“Prishtina e meriton një Qeveri që nuk e bllokon, nuk e saboton, por e ndihmon. E zhvillon”, ka deklaruar Abdixhiku.

Ai ka theksuar se LDK-ja ka një plan konkret për kryeqytetin, duke premtuar investime të mëdha financiare.

“‘Qiti paret’. Plot 1.5 miliardë euro për Kryeqytetin tonë”, ka shkruar Abdixhiku në postimin e tij.

Sipas tij, këto investime synojnë përmirësimin e infrastrukturës, zhvillimin urban dhe rritjen e cilësisë së jetës për qytetarët e Prishtinës, duke e kthyer kryeqytetin në një qendër moderne dhe funksionale për të gjithë banorët.