Marcelo për Mourinhon: Më ndihmoi të jem më agresiv

Më 6 shkurt ra perdja e karrierës së jashtëzakonshme të Marcelos, i cili vendosi të tërhiqej pas 22 vitesh futboll në nivelin më të lartë. Mbrojtësi i majtë brazilian, i rritur në radhët e të rinjve të Fluminense, bëri debutimin e tij profesionist përpara se të fluturonte drejt Evropës. Emri i tij, megjithatë, do të mbetet përgjithmonë i lidhur me Real Madridin, ku ai grumbulloi 546 paraqitje dhe 38 gola, duke fituar 25 trofe, përfshirë 5 Champions League.

Marcelo për José Mourinhon: “Ai më ndihmoi të jem më agresiv. Gjithmonë më pëlqente ta kisha topin në këmbët e mia, por ai më tha se fillimisht duhet të mësoja ta rikuperoja atë. Më mësoi shumë në stërvitje. Një herë më tha se nuk dija të mbroja, por se do të më mësonte. Më zemëroi disa herë, por në fund shkoi shumë mirë”.

Fjalë mjaltë edhe për Zinedine Zidane, me të cilin ndau vitet e suksesit: “Zidane e njihte dhomën e zhveshjes si pak kush. Më dha kaq shumë gëzim, e dua edhe si lojtar edhe si trajner. Më la shumë liri. Më tha: “Vazhdo, Casemiro është pas teje”.