Trump e quan “katastrofë” valën e migrantëve në Spanjë

Presidenti i SHBA-së, Donald Trump, foli për kalimet masive të emigrantëve në enklavën spanjolle të Afrikës së Veriut, Ceuta.

Presidenti i SHBA-së, Donald Trump, deklaroi të premten gjatë një mbledhjeje të kabinetit se pamjet e migrantëve që po hynin masivisht në enklavën spanjolle të Ceutës nga Maroku dukeshin si një “katastrofë”, por paralajmëroi se Shtetet e Bashkuara mund të përballen me një situatë edhe më të rëndë nëse demokratët rikthehen në pushtet.

“E pashë dje Spanjën dhe pashë katastrofën që ndodhi. Dukej si një pushtim i një vendi nga qindra mijëra njerëz. E njëjta gjë do të na ndodhë edhe neve nëse republikanët nuk zgjidhen. Madje edhe më keq, shumë më e madhe dhe shumë më e lehtë për të hyrë. Pavarësisht se kemi ndërtuar mijëra milje mur, siç kisha premtuar. Po të mos e kishim atë mur, harroni fare. Ne kemi kufirin më të sigurt në botë. Nëse nuk jemi në pushtet, vendi ynë do të pushtohet në nivele që do ta bënin atë që ndodhi në Spanjë të dukej e vogël”, tha Trump në Camp David.

“Kur e pashë këtë, thashë me vete se do ta përmend, sepse e dija se do të ishit në Camp David. Dhe thashë: ‘Kjo do të jetë një temë e rëndësishme për zgjedhjet e ndërmjetme, sepse kur shikon se çfarë ndodhi në Spanjë, ata nuk dinë çfarë të bëjnë.’ Dhe kjo po ndodh sërish edhe sot”, vazhdoi presidenti.

“Ata po hyjnë me dhjetëra mijëra. Praktikisht po pushtojnë vendin. Kjo është pasojë e ligjeve të dobëta, menaxhimit të keq dhe ligjeve shumë liberale. Ata miratuan disa ligje dhe njerëzit janë të zgjuar. Ata lexojnë se çfarë ndodh në vendet e tjera dhe pastaj notojnë ato rreth 3 milje ose gjejnë mënyra të tjera për të hyrë”, tha Trump, raporton FOXNews.