Kamboxhia thirrje për armëpushim me Tajlandën

Kamboxhia ka bërë thirrje për një armëpushim “të menjëhershëm” me Tajlandën,  ku mbi 30 persona kanë mbetur të vdekur në përleshjet e vazhdueshme kufitare.

Ambasadori i Kamboxhias në OKB, Chhea Keo, tha se vendi i tij kërkoi një armëpushim “pa kushte”, duke shtuar se Phnom Penh gjithashtu dëshironte një “zgjidhje paqësore të mosmarrëveshjes”.

Ministri i Jashtëm i Tajlandës, Maris Sangiampongsa, tha se Kamboxhia duhet të tregojë “sinqeritet të vërtetë në përfundimin e konfliktit” që bisedimet për armëpushim të vazhdojnë.

Të paktën 32 persona, ushtarë dhe civilë, janë vrarë dhe gati 200,000 të tjerë janë zhvendosur në dy vendet e Azisë Juglindore, të cilat akuzojnë njëra-tjetrën se qëlluan të parët.

Tajlanda akuzoi Kamboxhian se ka qëlluar në zona civile dhe evakuoi të gjitha fshatrat që konsideroheshin brenda rrezes së raketave të saj. Kamboxhia, nga ana e saj, akuzoi Tajlandën për përdorimin e municioneve thërrmuese.

Mosmarrëveshja midis dy vendeve daton më shumë se 100 vjet më parë, kur kufijtë e dy kombeve u hartuan pas pushtimit francez të Kamboxhias. Gjatë viteve ka pasur përleshje sporadike ku janë vrarë ushtarë dhe civilë nga të dyja palët.

Tensionet e fundit u përshkallëzuan në maj pasi një ushtar kamboxhian u vra në një përleshje, duke i zhytur marrëdhëniet dypalëshe në pikën e tyre më të ulët në më shumë se një dekadë. /rtsh/