Zelensky takohet me Macron në Paris: Lufta duhet të përfundojë sa më shpejt, paqja të jetë e qëndrueshme

Presidenti i Ukrainës Volodymyr Zelensky zhvilloi një takim disaorësh me presidentin e Francës Emmanuel Macron në format “kokë më kokë”.

Fokusi kryesor ishin negociatat për të përfunduar luftën dhe garancitë e sigurisë.

Kreu i shtetit ukrainas njoftoi presidentin Macron për detajet e takimit të djeshëm me palën amerikane në Shtetet e Bashkuara.

“Paqja duhet të bëhet vërtet e qëndrueshme. Lufta duhet të përfundojë sa më shpejt të jetë e mundur. Tashmë varet shumë nga angazhimi i çdo udhëheqësi,” theksoi Volodymyr Zelensky pas takimit.

Presidenti i Ukrainës vuri në dukje se biseda me udhëheqës të tjerë do të zhvillohen gjithashtu sot.

Ky takim vjen në mes të një valë diplomatike intensive, ku Zelensky dhe Macron diskutuan kushtet për një “paqe të drejtë dhe të qëndrueshme”, duke përfshirë rishikimin e një plani 28-pikësh të propozuar nga SHBA-të, i cili është kritikuar nga aleatët evropianë për favorshmërinë ndaj kërkesave ruse.

Macron ka theksuar nevojën për garanci “të forta” për Ukrainën, duke propozuar dërgimin e një force tokësore, detare dhe ajrore për të garantuar sigurinë pas një armëpushimi të mundshëm.

Gjatë bisedave, Zelensky dhe Macron folën me të dërguarin special amerikan Steve Witkoff dhe negociatorin kryesor ukrainas Rustem Umerov, ndërsa Zelensky u bashkua në një thirrje me rreth një duzinë udhëheqësish evropianë, duke përfshirë ato të Britanisë, Gjermanisë, Italisë, Polonisë dhe Bashkimit Evropian.

Takimi i fundit mes zyrtarëve ukrainas dhe amerikanë në Florida u përshkrua si “konstruktiv”, por Zelensky theksoi se “çështje të vështira” ende duhet të zgjidhen.

Ndërkohë, Kremlini konfirmoi se presidenti rus Vladimir Putin do të takohet me Witkoff-in nesër në Moskë, duke intensifikuar përpjekjet për një marrëveshje paqeje. /rtsh/