Zelensky: Centrali bërthamor Zaporizhzhias jashtë rrjetit, rrezik për incident bërthamor

Presidenti ukrainas Volodymyr Zelensky ka deklaruar se centrali bërthamor i Zaporizhzhias i pushtuar nga Rusia ka qenë jashtë rrjetit për shtatë ditë rresht, duke paralajmëruar për kërcënimin potencial.

Ai tha se një nga gjeneratorët rezervë me naftë që përdoren për të mirëmbajtur operacionet ka paraqitur defect dhe ndërprerja e energjisë elektrike do të përbënte “një kërcënim për të gjithë”.

Kjo është ndërprerja më e gjatë në Zaporizhzhia që kur Rusia pushtoi centralin bërthamor, më të madhin në Evropë.

“Kanë kaluar shtatë ditë tani. S’ka pasur kurrë diçka të tillë më parë”, tha Zelensky

duke shtuar: “Situata është kritike”.

Moska dhe Kievi kanë akuzuar vazhdimisht njëra-tjetrën për rrezikun e një katastrofe bërthamore potencialisht shkatërruese.

“Për shkak të sulmeve ruse, centrali është ndërprerë nga furnizimi me energji elektrike dhe rrjeti po furnizohet me energji elektrike nga gjeneratorët me naftë”, tha Zelensky.

Rusia tha javën e kaluar se termocentrali — të cilin e mori nën kontroll në javët e para të luftës në vitin 2022 — ka marrë furnizim rezervë me energji që nga një sulm që ia atribuoi Ukrainës.

Zelensky akuzoi Moskën për “pengesa në riparimin” e linjave të energjisë përmes sulmeve ajrore, duke thënë “ky është një kërcënim për absolutisht të gjithë”.

Gjashtë reaktorët e termocentralit, të cilët para luftës prodhonin rreth një të pestën e energjisë elektrike të Ukrainës, u mbyllën pasi Moska mori kontrollin.

Por termocentrali ka nevojë për energji për të mirëmbajtur sistemet e ftohjes dhe sigurisë, të cilat parandalojnë shkrirjen e reaktorëve — një rrezik që mund të shkaktojë një incident bërthamor.

Që nga fillimi i luftës, Zaporizhzhia ka parë kërcënime të shumta sigurie, duke përfshirë bombardime të shpeshta aty pranë, ndërprerje të përsëritura të energjisë dhe mungesa të stafit. /rtsh/