Turqia: Rezoluta e OKB-së për vendosjen e forcës së stabilizimit në Gazë, gati brenda 2 javësh

Rezoluta e Këshillit të Sigurimit të OKB-së që mandaton futjen e një Force Ndërkombëtare Stabilizimi në Gazë pritet të jetë gati brenda dy javësh, por mund të vonohet nëse nuk zgjidhen mosmarrëveshjet mbi mandatin e saj, përfshirë udhëheqjen ushtarake amerikane, marrëdhënien me policinë civile palestineze dhe një afat kohor për tërheqjen e plotë të ushtrisë izraelite.

Në një takim në Stamboll të hënën, ku u diskutua dërgimi i trupave nga vende myslimane, ministri i Jashtëm turk, Hakan Fidan, deklaroi se “vendimet e vendeve do të formësohen nga misioni dhe autoriteti i Forcës Ndërkombëtare të Stabilizimit. Nëse misioni bie ndesh me parimet dhe politikat e vendeve që do të dërgojnë trupa, do të jetë e vështirë për to të dërgojnë trupa”.

Fidan përsëriti gatishmërinë e Turqisë për të dërguar trupa – propozim i refuzuar nga Izraeli për shkak të mbështetjes së Ankarasë ndaj Hamasit.

Në takim morën pjesë ministrat e Jashtëm të Indonezisë, Pakistanit, Arabisë Saudite dhe Jordanisë, si dhe përfaqësues të Emirateve të Bashkuara Arabe dhe Katarit.

Egjipti, i konsideruar si udhëheqës i mundshëm i forcës, nuk ishte i pranishëm.

Jordania tha se nuk do të dërgojë trupa, por është e gatshme të trajnojë një polici palestineze për ruajtjen e rendit – por mbeten të paqarta ndërveprimet mes dy forcave dhe përgjegjësitë e tyre.

Ndërkohë, dhuna e vazhdueshme në Gazë ka rritur frikën për brishtësinë e armëpushimit: të martën u vranë 115 persona dhe u plagosën 352 – dita më vdekjeprurëse që nga hyrja në fuqi e armëpushimit më 10 tetor.

Nga ana e tij, ministri i Jashtëm gjerman, Johann Ëadephul, paralajmëroi se “duhet të shpejtojmë. Armëpushimi është i mirë, por na duhet të mbushim vakumin në Gaza për siguri dhe administrim.”

Fidan akuzoi Izraelin për shkelje të rregullta të armëpushimit dhe pengim të ndihmave humanitare. /rtsh/