Trump: Irani do të përballet me sulme me raketa nëse vazhdon me pasurimin e uraniumit

Presidenti i SHBA-së, Donald Trump ka minimizuar rëndësinë e uraniumit të pasuruar, që besohet se ndodhet në Iran.

”Objektet bërthamore të Iranit ishin goditur aq rëndë në sulmet ajrore në qershor të vitit të kaluar sa do të duheshin muaj për t’iu afruar uraniumit”, tha Trump në një fjalim drejtuar kombit në Shtëpinë e Bardhë, dje në mbrëmje.

”Situata po monitorohej nga afër me ndihmën e satelitëve”, shtoi ai.

”Nëse zbulohej edhe lëvizja më e vogël nga iranianët, ata do të goditeshin shumë fort me raketa”, tha ai.

“Ne i kemi të gjitha kartat, ata nuk kanë asnjë”, shtoi Trump.

Presidenti nuk iu referua drejtpërdrejt uraniumit të pasuruar, i cili besohet se ndodhet thellë nën objektet bërthamore të Iranit.

Në vend të kësaj, ai foli për “pluhur bërthamor”, një term që ai e ka përdorur më parë për rezervat e uraniumit të Iranit.

Për ditë të tëra, ka pasur raportime për një ofensivë të mundshme tokësore të SHBA-së në Iran.

”Wall Street Journal” raportoi, duke cituar zyrtarë amerikanë, se Trump po shqyrtonte aktualisht se sa i rrezikshëm do të ishte një operacion ushtarak për të rikuperuar uraniumin për trupat tokësore të nevojshme për një mision të tillë.

Para se Izraeli dhe SHBA-të të kryenin sulme ajrore ndaj Iranit në qershor 2025, duke përfshirë sulme ndaj tre objekteve bërthamore, vendi kishte më shumë se 400 kilogramë uranium të pasuruar në pastërti 60%, sipas Agjencisë Ndërkombëtare të Energjisë Atomike (IAEA).

Më shumë se 90% është e nevojshme për të ndërtuar armë bërthamore, megjithëse çdo pasurim i mëtejshëm në atë nivel do të kërkonte më pak përpjekje.

Sipas shefit të IAEA-s, Rafael Grossi, uraniumi ka të ngjarë të jetë kryesisht në tunele nëntokësore dhe vende magazinimi në objektet bërthamore në Isfahan dhe Natanz.

Të dy vendet ishin bombarduar vitin e kaluar.

Irani ka thënë vazhdimisht se programi i tij bërthamor shërben vetëm për qëllime civile dhe nuk synon zhvillimin e armëve bërthamore. /atsh/