Të dielën zgjedhjet në Kosovë, 2 milionë qytetarë drejt kutive të votimit

E diela shënon një ditë të rëndësishme për skenën politike në Kosovë. Rreth 2 milionë shtetas me të drejtë vote pritet t’u drejtohen kutive të votimit për të zgjedhur përbërjen e re të Kuvendit, në një proces të parakohshëm zgjedhor që ka angazhuar të gjitha hallkat e shtetit.

Gara për 120 vende në Kuvend

Në garë për të siguruar një vend në legjislativ janë gjithsej 1,146 kandidatë për deputetë. Ata përfaqësojnë 23 subjekte politike, të cilat do të kërkojnë besimin e qytetarëve në këto zgjedhje.

KQZ ka finalizuar përgatitjet logjistike:

948 Qendra Votimi do të hapen në mbarë vendin.

2,614 vendvotime janë në dispozicion.

Nga këto, 38 qendra (me 57 vendvotime) janë caktuar për votimin me kusht.

Siguria në nivel maksimal, 100 prokurorë në gatishmëri

Për të garantuar paprekshmërinë e votës, institucionet e sigurisë dhe drejtësisë kanë kaluar në gatishmëri të plotë.

Policia e Kosovës njoftoi se ka hartuar dhe po zbaton një plan të detajuar operativ për mbarëvajtjen e sigurisë. Blutë inkurajojnë qytetarët të raportojnë çdo veprim të dyshimtë apo të kundërligjshëm që mund të cenojë procesin.

Në krah të policisë, sistemi i drejtësisë ka mobilizuar rreth 100 prokurorë të shtetit, të cilët do të jenë në detyrë gjatë ditës së diel për të vepruar menjëherë ndaj çdo krimi zgjedhor.

Gjithashtu, Institucioni i Avokatit të Popullit do të jetë në terren për vëzhgim, me fokus të veçantë te grupet e margjinalizuara: personat e privuar nga liria, shtëpitë e të moshuarve dhe qendrat integruese.

Energjia elektrike, 1049 punonjës në terren

Një aspekt kritik i ditës së zgjedhjeve, veçanërisht gjatë numërimit, është furnizimi me energji. KEDS ka garantuar pas takimit me KQZ-në se furnizimi do të jetë i pandërprerë.

Për të shmangur çdo surprizë teknike, KEDS ka angazhuar 1,049 punëtorë, të organizuar në 140 ekipe të shpërndara në të gjithë territorin.

Secili vendvotim do të ketë një ekip teknik në afërsi për intervenim të shpejtë.

Një komision qendror teknik do të monitorojë situatën në kohë reale.

Tashmë gjithçka është gati për të dielën, ku fjalën e fundit do ta ketë votuesi.

/rtsh.al/