Prokuroria nis hetimet për tentim-vrasjen e një zyrtari të BE-së

Prokuroria Speciale e Kosovës ka bërë të ditur se ka nisur hetimet për rastin e therjes me mjete të mprehta të një zyrtari të Zyrës së Bashkimit Evropian.

Lajmin për Albanian Post e ka konfirmuar zëdhënësja e Prokurorisë Speciale, Arbnora Luta.

“Në koordinim me njësitë relevante të Policisë së Kosovës, Prokuroria Speciale është duke ndërmarrë të gjitha masat e nevojshme hetimore me qëllim të zbardhjes së plotë të gjendjes faktike”, deklaroi Luta.

Ajo shtoi se gjatë kësaj faze nuk mund të ndajnë më shumë informacione për këtë rast.

Ndërsa, Zyra e Bashkimit Evropian në Kosovë, ka thënë se janë të tronditur nga lajmi se një zyrtar i BE-së në Gjakovë është therur me thikë.