Përparim Rama: Kjo nuk është më politikë, është çnjerëzore – do ta çojmë rastin deri në instancat më të larta të drejtësisë

Kryetari i Komunës së Prishtinës, Përparim Rama, ka reaguar ashpër ndaj asaj që e cilëson si një fushatë të orkestruar politike kundër tij, duke deklaruar se sulmet kanë kaluar kufijtë e debatit politik dhe tashmë po prekin familjen dhe bashkëpunëtorët e tij.

Përmes një reagimi publik, Rama tha se për një kohë të gjatë ka qenë objekt i përpjekjeve për ta intimiduar dhe diskredituar, ndërsa theksoi se ditët e fundit fushata ka arritur kulmin me sulme ndaj bashkëshortes dhe njerëzve të afërt të tij.

Ai vlerësoi se çdo pretendim për interes publik duhet t’u drejtohet institucioneve të drejtësisë, por akuzoi kundërshtarët se po fshehin denigrimin, gjuhën e urrejtjes dhe linçimin pas pretendimeve për transparencë dhe interes publik.

Sipas Ramës, përfshirja e familjarëve dhe bashkëpunëtorëve në këtë përplasje nuk ka të bëjë me llogaridhënie, por përbën, sipas tij, “kalim të çdo kufiri njerëzor, moral dhe institucional”.

Kryetari i Prishtinës u shpreh gjithashtu i shqetësuar që kjo përmbajtje, sipas tij, është përdorur edhe si instrument politik në Asamblenë e Kryeqytetit, duke e cilësuar këtë si dëshmi të degradimit të debatit publik.
Në fund, Rama paralajmëroi se rasti do të ndiqet deri në instancat më të larta të drejtësisë dhe se, sipas tij, të gjithë ata që kanë marrë pjesë në organizimin, nxitjen apo përhapjen e fushatës linçuese do të identifikohen dhe do të mbajnë përgjegjësi ligjore.

“Shteti ligjor nuk mund të lejojë që linçimi dhe denigrimi të përdoren si instrumente të veprimit politik. Kjo nuk është më politikë. Është çnjerëzore!”, përfundoi Rama.