Netanyahu: Pengjet e vrara do t’i kthejmë një nga një, deri te i fundit

Në një fjalim të mbajtur në parlamentin izraelit kryeministri Benjamin Netanyahu, ka theksuar angazhimin e tij për kthimin e pengjeve të vrara që mbahen ende në Gazë, duke u zotuar se kjo mision do të përmbushet deri në fund.

Gjatë fjalimit, ai lexoi emrat e 16 pengjeve të vrara, duke filluar me Hadar Goldin, një oficer i Forcave të Mbrojtjes të Izraelit (IDF), i cili u vra në vitin 2014.

Megjithatë, fjalimi u shoqërua me një moment tensioni kur Netanyahu gabimisht e quajti ushtarin e vrarë Itay Chen si “Eitan Chen”, çka nxiti reagime dhe korrigjime nga opozita, duke krijuar një atmosferë të trazuar në sallë.

“Askush nuk ka nevojë të na kujtojë rëndësinë e misionit të shenjtë për kthimin e pengjeve të vrara,” tha Netanyahu, duke mbrojtur përpjekjet e qeverisë së tij.

Ai përmendi se puna për këtë çështje po vazhdon pa ndërprerje, duke iu referuar takimit të zhvilluar pak para fjalimit me këshilltarët e lartë të Shtëpisë së Bardhë, Steve Witkoff dhe Jared Kushner.

Ky takim, sipas tij, tregon angazhimin e vazhdueshëm për zgjidhjen e krizës së pengjeve.

Kryeministri hodhi poshtë pretendimet se marrëveshja e pranuar nga Izraeli në fillim të këtij muaji mund të ishte arritur një vit më parë.

“Në asnjë moment – as gjashtë muaj më parë, as një vit më parë, as një vit e gjysmë më parë – Hamasi nuk ka qenë i gatshëm të pranojë propozimin që ne arritëm tani,” deklaroi ai.

Sipas Netanyahut, marrëveshja aktuale përfshin kthimin e të gjithë pengjeve njëherësh, kontrollin e IDF-së mbi pjesën më të madhe të territorit të Gazës, praninë e forcave izraelite në terren, si dhe një angazhim të qartë me mbështetje të gjerë ndërkombëtare, përfshirë vendet arabe dhe pothuajse të gjithë botën myslimane, për çmilitarizimin e Rripit të Gazës dhe çarmatosjen e Hamasit.

Netanyahu rikonfirmoi vendosmërinë e qeverisë për të përmbushur të gjitha objektivat e luftës, duke përfshirë eliminimin e Hamasit si aktor diplomatik dhe ushtarak.

“Ne jemi të vendosur të arrijmë të gjitha qëllimet e luftës,” premtoi ai, duke theksuar se kjo përfshin jo vetëm kthimin e pengjeve, por edhe çrrënjosjen e aftësive ushtarake dhe politike të Hamasit. /rtsh/