Murati fajëson opozitën për mungesën e pagave të RTK-së: Po bllokojnë Kuvendin për muaj të tërë

Ministri në detyrë i Financave, Hekuran Murati, ka reaguar ndaj kritikave për vonesën e pagave të punëtorëve të Radiotelevizionit të Kosovës (RTK), duke thënë se përgjegjës për këtë situatë janë partitë opozitare që, sipas tij, po e mbajnë të bllokuar konstituimin e Kuvendit.

Murati theksoi se buxheti i RTK-së alokohet me vendim të Komisionit për Buxhet, Punë dhe Transfere, ndërsa Thesari vetëm ekzekuton pagesat pas këtij vendimi.

“Komisioni për Buxhet nuk ekziston aktualisht, sepse partitë opozitare po e mbajnë të bllokuar konstituimin e Kuvendit tash e disa muaj. Të njëjtit që po e mbajnë Kuvendin të bllokuar, tani po mundohen që mungesën e alokimit të buxhetit t’ia faturojnë Qeverisë”, ka shkruar Murati në Facebook.

Ai kujtoi se në dhjetor 2024, Komisioni për Buxhet, nën kryesimin e Armend Mujës, kishte miratuar pagesën e këstit për RTK-në jo për 3 muaj, si zakonisht, por për 6 muaj (janar–qershor 2025), duke parashikuar vonesa të mundshme pas zgjedhjeve.

Murati akuzoi PDK-në, LDK-në dhe AAK-në se po mbajnë Kuvendin të bllokuar “vetëm sepse janë kundër që Albulena Haxhiu të zgjidhet Kryetare e Kuvendit”, duke shtuar se “kapaciteti destruktiv i tyre tejkalon çdo imagjinatë”.

Sipas tij, opozita nuk është deklaruar asnjëherë lidhur me kërkesën që posti i nënkryetarit të Kuvendit t’i takojë dikujt që nuk vjen nga Lista Serbe, duke ironizuar se “për opozitën bën Lista Serbe për nënkryetar, por nuk bën Albulena Haxhiu për Kryetare”.