Flick: Atletiko shumë e fortë, por besojmë te kthesa

Barcelona bëhet gati për ndeshjen e kthimit të çerekfinaleve të Ligës së Kampioneve, në Estadio Metropolitano e pret Atletiko. Katalanasit humbën ndeshjen e parë në shtëpi me rezultatin 2-0 dhe për trajnerin Flick kualifikimi është i vështirë, aq më tepër përballë një kundërshtari si Atletiko, por jo i pamundur.

“Është e mundur kthesa, pse jo? Natyrisht, po luajmë kundër një skuadre shumë të fortë si Atletiko, kështu që do të na duhet një performancë shumë e fortë. Duhet të shfrytëzojmë të gjitha shanset që na krijohen sepse kjo ishte diferenca midis nesh dhe atyre në ndeshjen e fundit”.

“Një ndeshje prej 90 minutash ose më shumë është shumë komplekse. Është thelbësore që ne t’i ushtrojmë presion, Atletiko është një ekip shumë i mirë dhe nëse nuk e bën, nuk është e lehtë të mbrohesh kundër tyre”.

“Për ne, lidhjet midis lojtarëve janë shumë të rëndësishme. Ne duhet të mbrohemi si një njësi. Pa topin, është shumë e rëndësishme të menaxhojmë hapësirat dhe t’i bëjmë ato më të ngushta”.