City shkatërron Chelsean, ndez garën për titullin e kampionit

Manchester City është rikthyer fuqishëm në garën për titull të kampionit në Premier League, pasi mposhti me rezultat të pastër 3-0 Chelsea-n, duke e bërë edhe më të zjarrtë garën për kreun e tabelës.

Pas një pjese të parë të baraspeshuar, ku Chelsea krijoi disa raste më të rrezikshme – përfshirë tentativat e Cole Palmer dhe Pedro Neto – rezultati mbeti i pandryshuar. Një gol i Marc Cucurella u anulua për pozitë jashtë loje, ndërsa portieri Robert Sanchez bëri disa pritje vendimtare.

Në pjesën e dytë, City ndryshoi ritmin e lojës dhe kaloi në epërsi brenda gjashtë minutash, kur Nico O’Reilly shënoi me kokë pas asistimit të Rayan Cherki. Vetëm pak minuta më vonë, Cherki asistoi sërish, kësaj radhe për Marc Guéhi, i cili dyfishoi rezultatin.

Goli i tretë erdhi pas një gabimi në mesfushë, kur Jeremy Doku përfitoi dhe realizoi, duke vulosur fitoren dhe duke ndezur entuziazmin e tifozëve të Cityt.

Kjo fitore i jep një shtysë të madhe skuadrës së Pep Guardiola, e cila tani ndodhet gjashtë pikë prapa liderëve të Arsenal, por me një ndeshje më pak dhe një përballje direkte që pritet të jetë vendimtare për titullin.

Në anën tjetër, humbja e tretë radhazi në kampionat e lë Chelsea-n në krizë rezultatesh, duke mbetur katër pikë larg vendit të pestë që mbahet nga Liverpool.